काठमाडाैँ । नेपाली काँग्रेसका महामन्त्री गुरुराज घिमिरेले बलियो संगठन निर्माण गरी काँग्रेसलाई सबैभन्दा लोकप्रिय र सुदृढ पार्टी बनाउने बताउनुभएको छ ।
४४ औँ वीपी स्मृति दिवसका अवसरमा बिहीवार आयोजित एक कार्यक्रममा बोल्दै उहाँले काँग्रेसलाई समयको माग र कार्यकर्ताको चाहनाअनुसार अगाडि बढाउनुपर्ने बताउनुभएको हो ।
पार्टीको गुम्दै गएको ‘जीवनदायिनी शक्ति’ लाई पुनर्जागृत गर्न विशेष महाधिवेशनमार्फत युवा नेतृत्व चयन गरिएको उहाँको स्पष्टोक्ति छ । नेपाललाई ‘देवभूमि’ को संज्ञा दिँदै घिमिरेले यहाँको जीवनदायिनी शक्ति र ऊर्जा विघटित हुँदै गएको र त्यसलाई संगठित गर्न आवश्यक रहेकाले विशेष महाधिवेशन गरिएको उल्लेख गर्नुभयो ।
सोही सन्दर्भलाई पार्टीसँग जोड्दै उहाँले काँग्रेसको ऊर्जा पनि विघटनतर्फ जाँदै गरेको र पार्टीको जीवनदायिनी शक्ति क्षीण हुँदै गएको महशुस हुन थालेकाले पुनर्जीवन दिन विशेष महाधिवेशनबाट युवा शक्ति ल्याउनुपरेको बताउनु भयो । महामन्त्री घिमिरेले देश, समय र युगको मागअनुसार पार्टीका नेताहरूले रोजेको युवा नेतृत्वमार्फत काँग्रेसको शक्ति फर्काएको बताउनु भयो । काँग्रेसलाई युवा, महिला र विभिन्न पेशा–व्यवसायमा आवद्ध आम नागरिकहरूको ‘साझा घर’ बनाइने उहाँको भनाइ छ ।
पार्टीमा सबैले उत्साहपूर्वक काम गर्ने वातावरण सिर्जना गरी संसारलाई नमूना संगठन देखाउने प्रतिवद्धता व्यक्त गर्दै घिमिरेले सम्पूर्ण कार्यकर्ताहरूलाई यस दिशामा एकजुट भई अगाडि बढ्न आह्वान गर्नुभयो ।
