काठमाडौं । देशभर बर्डफ्लूको प्रभाव कम भएसँगै अण्डाको मूल्य बढेको छ।
नेपाल लेयर्स कुखुरापालक संघले चितवनमा सोमबार बसेको भौतिक तथा भर्चुअल बैठकपछि देशभरका अण्डा उत्पादकको राय, परामर्श र सिफारिसका आधारमा साउन ६ गतेदेखि लागू हुने गरी अण्डाको नयाँ फार्म समर्थन बिक्री मूल्य निर्धारण गरेको हो।
संघका अनुसार चितवनलाई आधार मानेर एक्सएल अण्डाको मूल्य प्रतिक्रेट रु ५१५, ठूलो अण्डाको रु ५००, मिडियम अण्डाको रु ४७० तथा सानो अण्डाको रु २,९०० प्रति पेटी कायम गरिएको छ। उपभोक्ता मूल्य प्रतिगोटा रु २५ तोकिएको छ।
संघका सचिव मदन पोखरेलका अनुसार पछिल्लो समय काठमाडौंसहित देशका अधिकांश क्षेत्रमा बर्डफ्लूको प्रभाव समाप्त भइसकेपछि अण्डाको माग बढ्न थालेको छ। यससँगै उत्पादनमा आएको कमीका कारण बजार मूल्य पनि वृद्धि भएको उनले बताए।
हाल केही समयअघि बर्डफ्लूका कारण बजार खस्किँदा निराश बनेका अण्डा उत्पादक किसानहरू बढ्दो माग र मूल्यका कारण राहत महसुस गर्न थालेका छन्। संघले निर्धारण गरेको नयाँ मूल्यअनुसार कारोबार गर्न सबै सम्बन्धित पक्षलाई अनुरोध गरेको छ।
