काठमाडौं । उद्योग, वाणिज्य तथा आपूर्ति मन्त्रालयअन्तर्गतको वाणिज्य, आपूर्ति तथा उपभोक्ता संरक्षण विभागले बजारमा गैरकानूनी रूपमा व्यापार गर्ने व्यवसायीलाई कडा कारबाही गर्ने चेतावनी दिएको छ।
चालु आर्थिक वर्ष २०८३/८४ को सूचना नं. ०३/०८३–८४ जारी गर्दै विभागले लेबल नभएका, न्यून गुणस्तरका, मिसावटयुक्त तथा चोरी पैठारी गरिएका वस्तुको उत्पादन, बिक्री–वितरण र कारोबारमा संलग्न जो–कोहीलाई कानुनी दायरामा ल्याइने स्पष्ट पारेको हो।
विभागका अनुसार भौतिक बजारसँगै विभिन्न अनलाइन प्लेटफर्ममार्फत दैनिक उपभोगका खाद्यवस्तु, पेय पदार्थ तथा लत्ताकपडा अवैध रूपमा बिक्री भइरहेको भन्ने उजुरी र जनगुनासो बढ्दै गएपछि सरकारको गम्भीर ध्यानाकर्षण भएको हो।
विभागले उपभोक्ता संरक्षण ऐन, २०७५ तथा उपभोक्ता संरक्षण नियमावली, २०७६ ले उपभोक्तालाई गुणस्तरीय वस्तु तथा सेवा प्राप्त गर्ने अधिकार सुनिश्चित गरेको उल्लेख गर्दै मिसावट गर्ने, चोरी पैठारीका सामान बिक्री गर्ने तथा कम गुणस्तरका वस्तु बजारमा ल्याउने कार्य कानुनअनुसार दण्डनीय रहेको जनाएको छ।
बजार स्वच्छता कायम गर्ने सरकारी नीतिअनुरूप विभागले उत्पादन, पैठारी, ढुवानी, सञ्चय तथा बिक्री–वितरणमा संलग्न सबै व्यवसायीलाई कानुनले तोकेका मापदण्ड, सर्त र बन्देजहरूको पूर्ण पालना गर्न निर्देशन दिएको छ।
विभागले आगामी दिनमा बजार अनुगमनलाई अझ प्रभावकारी बनाइने उल्लेख गर्दै उपभोक्ताको स्वास्थ्य र अधिकारमाथि खेलबाड गर्ने तथा कानुन उल्लंघन गर्ने कुनै पनि व्यवसायीलाई प्रचलित कानुनबमोजिम हदैसम्मको कारबाही गरिने चेतावनी दिएको छ।
