काठमाडौं । संसद सचिवालयमा कार्यरत महिला कर्मचारीलाई बलात्कार गरेको आरोप लागेपछि कृष्णबहादुर महराले सभामुखबाट दिएको राजीनामा ‘लटरपटर’ छ। मंगलबार स्वकीय सचिवमार्फत् उपसभामुख शिवमाया तुम्बाहाम्फेलाई बुझाएको राजीनामा पत्रमा उनले छानबिन प्रकिया नसकिँदासम्मका लागि राजीनामा दिएको बताएका छन्।
महराले दिएको राजीनामा पत्रमा प्रतिनिधि सभाका सभामुखको लेटर प्याड प्रयोग गरेका छन्। उनले बुझाएको राजीनामा पत्रले सभामुखबाट मात्र राजीनामा दिएको बुझिन्छ।
उपसभामुखलाई बुझाएको राजीनामा पछि उनी सभामुख पदबाट मुक्त भएका छन्। महराले सांसद पदबाट मुक्त हुन फेरि अर्को राजीनामा दिनु पर्ने नेकपाका एक नेताले बताए।
‘उहाँले सांसद पदबाट पनि राजीनामा दिनुपर्छ। नदिए पार्टीले उहाँलाई सांसदको हैसियतमा व्यवहार गर्दैन,’ उनले भने।
महरा २०७४ को प्रतिनिधि सभा निर्वाचनमा दाङ-२ बाट निर्वाचित भएका थिए।
