काठमाडाैँ । चालु आर्थिक वर्षको वैशाखसम्म विस्तृत मुद्रा प्रदायको वृद्धिदर १५ दशमलव २ प्रतिशत पुगेको । नेपाल राष्ट्र बैंकले आज सार्वजनिक गरेको आर्थिक वर्ष २०८२/८३ को मौद्रिक नीतिको वार्षिक समिक्षा प्रतिवेदनमा निजी क्षेत्रतर्फ प्रवाहित कर्जाको वृद्धिदर भने छ दशमलव पाँच प्रतिशतमा सीमित रहेको जनाएको छ ।
केन्द्रीय बैंकले चालु आवका लागि विस्तृत मुद्रा प्रदाय १३ प्रतिशत र निजी क्षेत्रतर्फ जाने कर्जा १२ प्रतिशतले वृद्धि हुने प्रक्षेपण गरेको थियो । समीक्षा प्रतिवेदनअनुसार दश महिनाको औसत मुद्रास्फीति दुई दशमलव ६६ प्रतिशत छ । चालु आवका लागि औसत उपभोक्ता मुद्रास्फीति पाँच प्रतिशतभित्र कायम राख्ने लक्ष्य लिइएको थियो । २०८३ वैशाखमा वार्षिक विन्दुगत उपभोक्ता मुद्रास्फीति पाँच दशमलव शून्य चार प्रतिशत कायम रहेको राष्ट्र बैंकले जनाएको छ ।
मौद्रिक नीतिले कम्तीमा सात महिनाको वस्तु तथा सेवा आयात धान्न पर्याप्त विदेशी विनिमय सञ्चिति कायम राख्ने लक्ष्य लिएकोमा वैशाख मसान्तसम्मको सञ्चिति १९ दशमलव दुई महिनाको वस्तु तथा सेवा आयात धान्न पर्याप्त रहेको प्रतिवेदनमा उल्लेख छ । चालु आवको मौद्रिक नीतिले भारित औसत अन्तरबैंक दरलाई मौद्रिक नीतिको सञ्चालन लक्ष्यका रूपमा यथावत् राख्दै स्वचालित तथा नियममा आधारित खुला बजार कारोबारलाई निरन्तरता दिने व्यवस्था गरेको थियो ।
समीक्षा अवधिमा भारित औसत अन्तरबैंक दरलाई सञ्चालन लक्ष्यका रूपमा राखी आवश्यकता अनुसार खुला बजार कारोबार तथा ब्याजदर करिडोरका उपकरण परिचालन गरिएको राष्ट्र बैंकले जनाएको छ । खुला बजार कारोबार विनियमावली तथा कार्यविधिअनुसार स्वचालित र नियममा आधारित ढङ्गले सञ्चालन हुँदै आएको पनि प्रतिवेदनमा उल्लेख छ ।
मौद्रिक नीतिमार्फत चेक अनादरका कारण कालोसूचीमा पर्ने विद्यमान व्यवस्थामा नीतिगत सहजीकरण गर्ने लक्ष्य राखिएकोमा सो विषयमा अध्ययन भइरहेको राष्ट्र बैंकले जनाएको छ । यस्तै, ग्राहकको क्रेडिट स्कोरका आधारमा समेत बैंक तथा वित्तीय संस्थाले कर्जा प्रवाह गर्न सक्ने व्यवस्था कार्यान्वयनका लागि विद्युतीय माध्यमबाट प्रवाह हुने कर्जासम्बन्धी मार्गदर्शन, २०७८ मा आवश्यक संशोधन गरी २०८३ जेठ २५ गते जारी गरिएको राष्ट्र बैंकले जनाएको छ ।
