काठमाडौं । स्टक ब्रोकर एसोसिएसन अफ नेपालको प्रतिनिधिमण्डलले नेपाल धितोपत्र बोर्ड (सेबोन) का नवनियुक्त अध्यक्ष डा. गोपाल प्रसाद भट्ट लाई भेट गरी बधाई तथा सफल कार्यकालको शुभकामना व्यक्त गरेको छ।
एसोसिएसनका अध्यक्ष सागर ढकाल को नेतृत्वमा गएको टोलीले बिहीबार अध्यक्ष भट्टसँग शिष्टाचार भेट गरेको हो।
भेटका क्रममा अध्यक्ष भट्टले नेपालको पुँजी बजारलाई थप पारदर्शी, विश्वसनीय, प्रतिस्पर्धी तथा लगानीकर्तामैत्री बनाउन आफू प्रतिबद्ध रहेको बताउनुभयो। उहाँले सरकारको बजेट तथा नीति–कार्यक्रमअनुसार पुँजी बजारको विकास, विस्तार र सुदृढीकरणका लागि आवश्यक पहल गरिने जानकारी दिनुभयो।
उहाँले पुँजी बजारको दिगो विकासका लागि नियामक निकाय, धितोपत्र व्यवसायी, सूचीकृत कम्पनी, लगानीकर्ता तथा अन्य सरोकारवालाबीच समन्वय र सहकार्यलाई थप मजबुत बनाइने उल्लेख गर्नुभयो। साथै, बजारको पारदर्शिता, सुशासन, लगानीकर्ताको हित संरक्षण तथा आधुनिक प्रविधिको प्रयोगमार्फत नेपाली पुँजी बजारलाई नयाँ उचाइमा पुर्याउने लक्ष्य रहेको पनि उहाँले बताउनुभयो।
त्यस अवसरमा अध्यक्ष ढकालले पुँजी बजारको दिगो विकास, लगानीकर्ताको विश्वास अभिवृद्धि, बजार विस्तार तथा आवश्यक नीतिगत र संरचनागत सुधारका लागि एसोसिएसनले रचनात्मक सुझाव, सहयोग र सहकार्यलाई निरन्तरता दिने प्रतिबद्धता व्यक्त गर्नुभयो।
भेटवार्तामा सरकारको बजेटमा समेटिएका पुँजी बजारसम्बन्धी कार्यक्रमको प्रभावकारी कार्यान्वयन, बजार सुधार, नयाँ वित्तीय उपकरणको विकास, लगानीकर्ता शिक्षा, प्रविधिमैत्री सेवा विस्तार तथा पुँजी बजारको संस्थागत सुदृढीकरणका विषयमा समेत छलफल भएको एसोसिएसनले जनाएको छ।
