काठमाडौं । सर्वोच्च अदालतले नेकपा एमालेका उपाध्यक्ष तथा पूर्वमन्त्री विष्णुप्रसाद पौडेलको बन्दीप्रत्यक्षीकरण रिट निवेदनमाथि सुनुवाइ गर्दै विभिन्न अदालतमा विचाराधीन तथा फैसला भइसकेका पाँच वटा मुद्दाका सक्कल मिसिल अध्ययनका लागि झिकाउन आदेश दिएको छ।
न्यायाधीशद्वय टेकप्रसाद ढुङ्गाना र मेघराज पोखरेलको संयुक्त इजलासले सोमबार उक्त आदेश जारी गरेको हो।
आदेशअनुसार विशेष अदालतमा विचाराधीन नेपाल सरकार वादी र दीपक भट्टसमेत प्रतिवादी रहेको सम्पत्ति शुद्धीकरण सम्बन्धी मुद्दाको फाइल झिकाउन भनिएको छ।
त्यसैगरी उच्च अदालत पाटनमा विचाराधीन दीपक भट्टसमेत प्रतिवादी रहेको बैंकिङ कसुर सम्बन्धी मुद्दाको मिसिल पनि मगाउन आदेश दिइएको छ।
यस्तै, काठमाडौं जिल्ला अदालतमा रहेका आशिष श्रेष्ठसमेत प्रतिवादी भएको बिमा कसुर सम्बन्धी मुद्दा तथा सुलभ अग्रवाल र दीपक भट्ट प्रतिवादी रहेका धितोपत्र (सेयर) सम्बन्धी दुई छुट्टाछुट्टै मुद्दाका सक्कल फाइलसमेत झिकाउन सर्वोच्चले निर्देशन दिएको छ।
यसका साथै, दीपक भट्टले गृह मन्त्रालयविरुद्ध यसअघि दायर गरेको बन्दीप्रत्यक्षीकरणको रिट निवेदनको किनारा लागेको मिसिल सर्वोच्च अदालतकै अभिलेख शाखाबाट झिकाउन पनि आदेश दिइएको छ।
सर्वोच्च अदालतले ती सबै मिसिलहरू असार १८ गतेको पेशीअघि उपलब्ध गराउन सम्बन्धित निकायलाई निर्देशन दिएको छ।
बन्दीप्रत्यक्षीकरण रिटमा उठाइएका विषयवस्तुको गम्भीरता तथा अन्य सम्बन्धित मुद्दासँगको अन्तर्सम्बन्ध अध्ययन गर्न आवश्यक देखिएकाले अदालतले सम्बन्धित मिसिलहरू झिकाउन आदेश दिएको हो।
