काठमाडौं । सत्तारूढ राष्ट्रिय स्वतन्त्र पार्टी (रास्वपा) ले प्रथम महाधिवेशनबाट निर्वाचित केन्द्रीय समितिका सदस्यहरूको अद्यावधिक अन्तिम नामावली सार्वजनिक गरेको छ।
महाधिवेशन निर्वाचनको प्रारम्भिक नतिजा प्रकाशनका क्रममा भएको प्राविधिक त्रुटि सच्याउँदै रास्वपाले यसअघि छुटेका पूजा बास्तोला र ध्रुवकुमार थापा मगरलाई निर्वाचित केन्द्रीय सदस्यका रूपमा समावेश गर्दै संशोधित नामावली सार्वजनिक गरेको हो।
रास्वपाको केन्द्रीय निर्वाचन आयोगका अनुसार प्रारम्भिक नतिजा प्रकाशनपछि मतपरिणाम, उम्मेदवारी दर्ताका कागजात तथा सम्बन्धित प्रमाणहरूको पुनः अध्ययन गर्दा जनजाति क्लस्टरतर्फ कृष्णमान श्रेष्ठको सट्टा ध्रुवकुमार थापा मगर निर्वाचित भएको पुष्टि भएको थियो। त्यसपछि ध्रुवकुमार थापा मगरलाई निर्वाचित केन्द्रीय सदस्य घोषणा गर्ने निर्णय गरिएको आयोगले जनाएको छ।
त्यस्तै, प्रादेशिक (भूगोल) तर्फ गण्डकी प्रदेशको मतपरिणाममा पनि त्रुटि भएको आयोगले स्वीकार गरेको छ। पुनः अध्ययन गर्दा सोम शर्माको सट्टा पूजा बास्तोला निर्वाचित हुनुपर्ने देखिएकाले उनलाई गण्डकी प्रदेशको प्रादेशिक (भूगोल) तर्फ निर्वाचित केन्द्रीय सदस्य घोषणा गरिएको आयोगले जनाएको छ।
निर्वाचन आयोगले प्रारम्भिक परिणाम घोषणाका क्रममा भएको प्राविधिक त्रुटिलाई सच्याउँदै अद्यावधिक अन्तिम नामावली सार्वजनिक गरिएको स्पष्ट पारेको छ।
