काबुल। अफगानिस्तानमा गत एक वर्षमा लागूऔषधको लतमा परेका ४५ हजारभन्दा बढी व्यक्तिले उपचार पूरा गरी परिवारसँग पुनर्मिलन गरेको अफगान जनस्वास्थ्य मन्त्रालयले जनाएको छ ।
लागूऔषध नियन्त्रण तथा जनचेतनासम्बन्धी एक कार्यक्रममा मन्त्रालयअन्तर्गतको राष्ट्रिय लागूऔषध लत उपचार कार्यक्रमका निर्देशक अल–हाफिज इनामुल्लाह अम्मरले ४५ हजारभन्दा बढी दुव्र्यसनीले उपचार सेवा प्राप्त गरेको जानकारी दिनुभयो ।
उहाँका अनुसार करिब तीन लाख व्यक्ति लागूऔषध दुरुपयोग रोकथामसम्बन्धी जनचेतनामूलक अभियानबाट लाभान्वित भएका छन् । ‘देशभर लागूऔषध नियन्त्रणका प्रयासलाई थप प्रभावकारी बनाउँदै उपचार सेवा विस्तार गर्न सरकार प्रतिबद्ध छ,’ अम्मरले भन्नुभयो ।
मन्त्रालयका उपचारात्मक औषधि महानिर्देशक वाहदत अलोकोजेका अनुसार हाल अफगानिस्तानभरका करिब ६७ अस्पतालबाट लागूऔषध दुव्र्यसनीको उपचार सेवा उपलब्ध गराइँदै आएको छ ।
अमेरिका र उसका सहयोगी राष्ट्रहरूको सैन्य उपस्थितिका क्रममा अफगानिस्तान विगत दुई दशकसम्म अफिम र हेरोइनको प्रमुख विश्व उत्पादकमध्ये एक बनेको थियो ।
त्यस अवधिमा लाखौँ व्यक्ति लागूऔषधको लतमा फसेका थिए, जसका कारण गरिब मुलुक अफगानिस्तानले अहिले पनि गम्भीर सार्वजनिक स्वास्थ्य तथा सामाजिक चुनौती सामना गरिरहेको छ । रासस
