काठमाडौँ । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले वर्तमान राजनीतिक परिस्थितिमा प्रतिगमनलाई परास्त गर्नु नै सबैभन्दा महत्वपूर्ण जिम्मेवारी भएको बताएका छन्।
जननेता मदन भण्डारीको ७५औँ जन्मजयन्तीको अवसरमा आइतबार काठमाडौँमा आयोजित ‘नेपालको कम्युनिस्ट आन्दोलन र जननेता मदन भण्डारी’ विषयक विचार गोष्ठी तथा ‘मदन भण्डारी राष्ट्रिय पुरस्कार हस्तान्तरण समारोह’लाई सम्बोधन गर्दै उनले समाजवाद निर्माणको लक्ष्यतर्फ अघि बढ्नुअघि प्रतिगामी प्रवृत्तिलाई पराजित गर्न आवश्यक रहेको धारणा व्यक्त गरे।
ओलीले अहिलेको अवस्थामा लोकतान्त्रिक वामपन्थी शक्तिहरूबीच कार्यगत एकता अपरिहार्य रहेको उल्लेख गर्दै प्रतिगमनविरुद्ध साझा अभियान सञ्चालन गर्नुपर्ने बताए। उनका अनुसार देशको लोकतान्त्रिक उपलब्धिको रक्षा गर्दै अगाडि बढ्न सबै वामपन्थी शक्तिले सहकार्य गर्न आवश्यक छ।
उनले प्रतिगमनको चुनौती कायम रहेसम्म समाजवाद निर्माणको यात्राले अपेक्षित गति लिन नसक्ने भन्दै लोकतान्त्रिक शक्तिहरू एकताबद्ध भएर त्यसलाई परास्त गर्नुपर्नेमा जोड दिए।
