काठमाडौं । नेपाली कम्युनिस्ट पार्टी (नेकपा) का नेता तथा पूर्वप्रधानमन्त्री झलनाथ खनालले जननेता मदन भण्डारी र जीवराज आश्रितको हत्या गर्ने व्यक्तिहरूको पहिचान गर्न नसक्नु कम्युनिस्ट आन्दोलनकै कमजोरी भएको बताएका छन्। उनले अब विगतका विभाजन र विवादलाई पछाडि छोड्दै वामपन्थी शक्तिहरूलाई दीर्घकालीन रूपमा एकताबद्ध बनाउनुपर्ने आवश्यकता औँल्याएका छन्।
आइतबार राष्ट्रिय सभागृहमा मदन भण्डारीको ७५औँ जन्मजयन्तीको अवसरमा आयोजित ‘नेपालको कम्युनिस्ट आन्दोलन र जननेता मदन भण्डारी’ विषयक विचार गोष्ठी तथा ‘मदन भण्डारी राष्ट्रिय पुरस्कार हस्तान्तरण समारोह’लाई सम्बोधन गर्दै खनालले मदन भण्डारी र जीवराज आश्रितको हत्या योजनाबद्ध र कायरतापूर्ण रूपमा गरिएको दाबी गरे।
उनले ती हत्याको वास्तविक योजनाकार र दोषीको पहिचान गर्न नसक्नु आन्दोलनभित्रकै कमजोरी भएको स्वीकार गर्दै सत्य बाहिर ल्याउने जिम्मेवारी अझै बाँकी रहेको बताए।
खनालका अनुसार मदन भण्डारी र जीवराज आश्रितमाथि भएको आक्रमण केवल दुई व्यक्तिको हत्या नभई नेपालको कम्युनिस्ट आन्दोलनलाई कमजोर पार्ने उद्देश्यसहित रचिएको षड्यन्त्र थियो। त्यस्ता प्रवृत्तिहरूको खतरा अझै समाप्त नभएकाले राजनीतिक रूपमा सचेत र एकताबद्ध हुनुपर्ने उनको भनाइ थियो।
पूर्वप्रधानमन्त्री खनालले मदन भण्डारीले तत्कालीन नयाँ जनवादी क्रान्तिको सन्दर्भमा अघि सारेको कार्यदिशाबाट अहिले पनि शिक्षा लिनुपर्ने उल्लेख गर्दै वर्तमान परिस्थितिमा समाजवादी रूपान्तरणका लागि नयाँ राजनीतिक रणनीति निर्माण गर्नुपर्ने धारणा राखे।
उनले वामपन्थी दलहरूबीच विगतमा विभिन्न कारणले विभाजन र अहंकार हाबी भएको स्वीकार गर्दै अब परिस्थितिले दीर्घकालीन एकताको आवश्यकता सिर्जना गरिसकेको बताए। “कहिले सिङ पलायो, कहिले जुरो पलायो भन्ने अवस्था धेरै भयो,” भन्दै उनले अब वामपन्थी शक्तिहरूले साझा लक्ष्यका साथ स्थायी एकताको बाटो रोज्नुपर्नेमा जोड दिए।
