काठमाडौं । नेकपाका नेता झलनाथ खनालले जननेता मदन भण्डारी र जीवराज आश्रितको निधन सामान्य दुर्घटना नभई योजनाबद्ध षड्यन्त्रको परिणाम भएको दाबी गरेका छन्।
मदन भण्डारीको ७५औँ जन्मजयन्तीका अवसरमा आइतबार आयोजित कार्यक्रममा बोल्दै खनालले उक्त घटनाको वास्तविकता तीन दशक बितिसक्दा पनि सार्वजनिक हुन नसकेको बताए। उनले घटनामा संलग्न व्यक्तिहरूको पहिचान गर्न नसक्नु आफूहरूको कमजोरी भएको स्वीकार गर्दै त्यसबेला नेपालको कम्युनिस्ट आन्दोलनलाई कमजोर बनाउने उद्देश्यले देशी–विदेशी प्रतिक्रियावादी शक्तिहरू सक्रिय भएको आरोप लगाए।
उनका अनुसार मदन भण्डारीमाथि लक्षित गरिएको षड्यन्त्र कुनै एक व्यक्तिविरुद्ध मात्र नभई समग्र नेपाली कम्युनिस्ट आन्दोलनलाई कमजोर पार्ने योजनाको हिस्सा थियो। उनले यस्तो षड्यन्त्रको प्रभाव अहिले पनि विभिन्न रूपमा देखिएको दाबी गरे।
खनालले कम्युनिस्ट आन्दोलनमाथि हुने राजनीतिक र वैचारिक आक्रमणप्रति सबै नेता–कार्यकर्ता सचेत हुनुपर्नेमा जोड दिए। उनले आन्दोलनको रक्षा र सुदृढीकरणका लागि एकताबद्ध भएर अघि बढ्नुपर्ने आवश्यकता औँल्याए।
