विराटनगर। कोशी प्रदेशका मुख्यमन्त्री हिक्मतकुमार कार्कीले प्रेस तथा सञ्चार क्षेत्रलाई उपेक्षा गरेर नागरिक स्वतन्त्रता स्थापित हुन नसक्ने बताउनुभएको छ ।
नेपाल पत्रकार महासङ्घ कोशी प्रदेशले आज विराटनगरमा आयोजना गरेको ‘कोशी मिडिया सम्मेलन’को उद्घाटन गर्दै मुख्यमन्त्री कार्कीले लोकतन्त्रको सुदृढीकरण, नागरिक अधिकारको संरक्षण तथा सुशासन प्रवर्द्धनका लागि सञ्चारमाध्यम र सञ्चारकर्मीको भूमिका महत्वपूर्ण रहेको उल्लेख गर्नुभयो । उहाँले लोकतन्त्रको मूल मर्म नै फरक विचार, विरोध र आलोचनालाई सम्मान गर्नु रहेको उल्लेख गर्दै विरोध तथा आलोचना लोकतन्त्रको सुन्दर पक्ष भएको बताउनुभयो ।
सत्य र तथ्यमा आधारित, जिम्मेवार तथा मर्यादित पत्रकारिताले लोकतान्त्रिक प्रणालीलाई अझ बलियो बनाउने मुख्यमन्त्री कार्कीले विश्वास व्यक्त गर्नुभयो । आगामी साउन १ गतेदेखि कोशी प्रदेश सरकारले सबै सञ्चार माध्यमलाई समान रूपमा विज्ञापन प्राप्त गर्ने हक र अवसर सुनिश्चित गर्ने नीति कार्यान्वयनमा ल्याउने उहाँले जानकारी दिनुभयो । प्रेस क्षेत्रलाई बेवास्ता गरेर अभिव्यक्ति स्वतन्त्रता र नागरिक अधिकारको पूर्ण प्रत्याभूति सम्भव नहुने उहाँको भनाइ थियो ।
लोकतन्त्र नेपाली समाजको संस्कृतिका रूपमा स्थापित भइसकेकाले यसलाई कसैले पनि समाप्त गर्न नसक्ने मुख्यमन्त्री कार्कीले जिकिर गर्नुभयो । जनताको सङ्घर्ष, भावनाद्धारा स्थापित लोकतान्त्रिक व्यवस्थालाई थप सुदृढ बनाउन सञ्चार जगतले पनि आफ्नो मर्यादा, निष्पक्षता र व्यावसायिक आचारसंहितालाई आत्मसात् गर्नुपर्नेमा उहाले जोड दिनुभयो ।
मुख्यमन्त्री कार्कीले प्रदेश सरकारले आगामी साउन महिनादेखि आवश्यक बजेट र कार्यविधिसहित सञ्चार प्रतिष्ठान गठन गर्ने तयारी पूरा गरेको जानकारी दिँदै यसबाट पत्रकार तथा सञ्चार क्षेत्रको संस्थागत विकास र क्षमता अभिवृद्धिमा सहयोग पुग्ने विश्वास व्यक्त गर्नुभयो ।
सम्मेलनका अवसरमा नेपाल पत्रकार महासङ्घका पूर्वअध्यक्ष विष्णु निष्ठुरी, डा महेन्द्र विष्ट र शिव गाउँलेलाई पत्रकारिता क्षेत्रमा पु¥याउनुभएको योगदानको कदर स्वरूप सम्मान गरिएको थियो ।
महासङ्घका महासचिव रामप्रसाद दाहालले ‘पत्रकार आचारसंहिता र मर्यादित पत्रकारिता’ तथा महासङ्घ कोशी प्रदेशका पूर्वअध्यक्ष मोहन काजीले ‘कोशी प्रदेशका पत्रकारको अवस्था’ विषयमा कार्यपत्र प्रस्तुत गर्नुभएको थियो । रासस
