काठमाडौं । सरकारले कक्षा १२ को परीक्षाको नतिजाबारे विद्यार्थीहरूले उठाएका गुनासो तथा प्रश्नहरूको सम्बोधन गर्न समिति गठन गरेको छ।
शिक्षा तथा खेलकुदमन्त्री सस्मित पोखरेलले कक्षा १२ को उत्तरपुस्तिकाको नमुना परीक्षण (स्याम्पलिङ), प्राप्ताङ्क तथा डेटा इन्ट्रीको पुनः प्रमाणीकरण (भेरिफिकेसन) गर्न समिति गठन गरिएको जानकारी दिएका छन्। उनका अनुसार शिक्षा तथा खेलकुद मन्त्रालय र पाठ्यक्रम विकास केन्द्रका उपसचिवहरूको प्रतिनिधित्व रहने गरी उक्त समिति गठन गरिएको हो।
हालै सार्वजनिक गरिएको कक्षा १२ को नतिजामा त्रुटि भएको आरोप लगाउँदै विद्यार्थीहरूले विरोध जनाउँदै आएका छन्। नतिजा हतारमा प्रकाशन गर्दा गडबडी भएको दाबी गर्दै उनीहरूले बिहीबार काठमाडौंको माइतीघर मण्डलामा प्रदर्शनसमेत गरेका थिए।
विद्यार्थीहरूको विरोधप्रति आफ्नो ध्यानाकर्षण भएको जनाउँदै मन्त्री पोखरेलले नतिजा प्रकाशनमा कुनै हतार नगरिएको दाबी गरेका छन्।
उनले सामाजिक सञ्जालमार्फत जारी गरेको वक्तव्यमा भनेका छन्, “नतिजा समयमै प्रकाशन गर्न कुनै हतार गरिएको होइन। आवश्यक जनशक्ति थप गरी तथा अनावश्यक प्रशासनिक प्रक्रिया छोट्याएर नतिजा प्रकाशित हुनुपर्ने समयमा नै सार्वजनिक गरिएको हो।”
मन्त्री पोखरेलले आन्दोलनरत विद्यार्थीप्रति सामाजिक सञ्जालमा अपमानजनक टिप्पणी नगर्न पनि सबैलाई आग्रह गरेका छन्।
“विद्यार्थीप्रति गरिएका केही नकारात्मक तथा असम्मानजनक टिप्पणीहरूले मेरो ध्यानाकर्षण भएको छ। शान्तिपूर्ण रूपमा आन्दोलन गरिरहेका कुनै पनि व्यक्ति वा समूहप्रति सामाजिक सञ्जालमा दुर्व्यवहार, गालीगलौज वा असम्मानजनक टिप्पणी नगर्न सबैमा अनुरोध गर्दछु,” उनले भने।
