काठमाडौं । राष्ट्रिय स्वतन्त्र पार्टी (रास्वपा) को जारी राष्ट्रिय महाधिवेशनअन्तर्गत निर्वाचन प्रक्रियाका लागि केन्द्रीय निर्वाचन आयोगले उम्मेदवारका प्रस्तावक तथा समर्थक सम्बन्धी मापदण्ड सार्वजनिक गरेको छ।
आयोगले आज सूचना जारी गर्दै सभापति, पदाधिकारी तथा केन्द्रीय सदस्य पदका उम्मेदवारहरूले मनोनयन दर्ता गर्दा प्रस्तावक र समर्थक सम्बन्धी तोकिएका नियम अनिवार्य रूपमा पालना गर्नुपर्ने जनाएको हो।
सूचनाअनुसार सभापति पदका उम्मेदवारले मनोनयन फारम दर्ता गर्दा एक जना प्रस्तावक र ५१ जना समर्थकको नाम, सम्पर्क नम्बर तथा हस्ताक्षर अनिवार्य रूपमा पेश गर्नुपर्नेछ। त्यसैगरी पदाधिकारी तथा केन्द्रीय सदस्य पदका उम्मेदवारले एक जना प्रस्तावक र २१ जना समर्थकको नाम, सम्पर्क नम्बर तथा हस्ताक्षरसहित मनोनयन फारम दाखिला गर्नुपर्ने व्यवस्था गरिएको छ।
आयोगले कुनै पनि प्रस्तावकले एकभन्दा बढी उम्मेदवारको मनोनयन फारममा प्रस्तावकका रूपमा हस्ताक्षर गर्न नपाउने स्पष्ट पारेको छ। यद्यपि समर्थकले भने एकभन्दा बढी उम्मेदवारको फारममा समर्थकका रूपमा हस्ताक्षर गर्न सक्ने व्यवस्था गरिएको छ।
त्यस्तै उम्मेदवारका प्रस्तावक वा समर्थक बन्ने व्यक्तिको नाम महाधिवेशन प्रतिनिधिको सूचीमा अनिवार्य रूपमा समावेश भएको हुनुपर्ने तथा प्रस्तावक वा समर्थक स्वयं उम्मेदवार बन्न नपाउने उल्लेख गरिएको छ।
केन्द्रीय निर्वाचन आयोगले सूचनामा उल्लेखित प्रावधान विपरीत दर्ता गरिएका उम्मेदवारी फारम स्वतः अमान्य हुने चेतावनी समेत दिएको छ। आयोगले निर्वाचन प्रक्रियालाई व्यवस्थित, पारदर्शी र निष्पक्ष बनाउन सबै उम्मेदवार तथा प्रतिनिधिलाई निर्धारित नियमको पूर्ण पालना गर्न आग्रह गरेको छ।
