काठमाडाैँ । जनमत पार्टीका अध्यक्ष सीके राउतले राष्ट्रिय स्वतन्त्र पार्टी (रास्वपा) का कार्यकर्तामा देखिएको देश परिवर्तन गर्ने जोश र प्रतिबद्धताको खुलेर प्रशंसा गरेका छन्।
चितवनमा आयोजित रास्वपाको उद्घाटन सत्रलाई सम्बोधन गर्दै उनले कार्यकर्ताहरूले व्यक्तिगत लाभ वा पद–प्रतिष्ठाका लागि नभई देश बनाउने लक्ष्यका साथ सक्रियता देखाएको बताएका हुन्।
“तपाईंहरू धेरैजसो ऋण काढेर, भोकै बसेर, वा अरुको सवारी साधन प्रयोग गरेर यहाँ आउनुभएको होला। तर तपाईंहरूको उद्देश्य पद वा प्रतिष्ठा होइन,” राउतले भने, “तपाईंहरूभित्र देश निर्माण गर्ने गहिरो जुनून र अठोट छ।”
उनका अनुसार रास्वपा कार्यकर्तामा देशलाई बदल्ने बलियो आकांक्षा देखिन्छ, जुन सकारात्मक राजनीतिक ऊर्जा हो। उनले आफू प्रतिस्पर्धीको रूपमा होइन, सहयात्री र सहयोगीको रूपमा शुभकामना दिन कार्यक्रममा उपस्थित भएको पनि स्पष्ट पारे।
