काठमाडौँ । राष्ट्रिय प्रजातन्त्र पार्टी (राप्रपा)ले आगामी महाधिवेशनका लागि विस्तृत कार्यतालिका अनुमोदन गरेको छ।
पार्टीको केन्द्रीय कार्यालय धुम्बाराहीमा बिहीबार बसेको केन्द्रीय कार्यसम्पादन समितिको बैठकले आगामी मंसिर २६, २७ र २८ गते काठमाडौँमा महाधिवेशन आयोजना गर्ने निर्णय गरेको हो।
बैठकपछि अध्यक्ष राजेन्द्र लिङ्देनले निर्वाचन समितिले पेश गरेको महाधिवेशनसम्बन्धी नियमावली र निर्देशिकालाई आवश्यक परिमार्जनसहित स्वीकृत गरिएको जानकारी दिए।
उनका अनुसार कार्यसम्पादन समितिबाट पारित प्रस्तावहरू शुक्रबारदेखि सुरु हुने केन्द्रीय समितिको बैठकमा प्रस्तुत गरिनेछ। केन्द्रीय समितिले ती प्रस्तावमाथि विस्तृत छलफल गरी आवश्यक निर्णय लिनेछ।
राप्रपाले महाधिवेशनको तयारीलाई समयमै सम्पन्न गर्न भदौ मसान्तभित्र जिल्ला अधिवेशनहरू सम्पन्न गर्ने तथा असोज मसान्तसम्म सक्रिय सदस्यता वितरणको काम टुंग्याउने प्रस्तावसमेत अघि सारेको अध्यक्ष लिङ्देनले बताए।
पार्टीले महाधिवेशनलाई संगठन सुदृढीकरण र भावी राजनीतिक कार्यदिशा तय गर्ने महत्वपूर्ण अवसरका रूपमा लिएको जनाएको छ।
