काठमाडौँ । विशेष अदालतले राहदानी विभागका महानिर्देशक तीर्थराज अर्याल र निर्देशक सुनीलकुमार केसीलाई चार दिन थुनामा राखेर अनुसन्धान गर्न अख्तियार दुरुपयोग अनुसन्धान आयोगलाई अनुमति दिएको छ।
विशेष अदालतका अध्यक्ष सुदर्शनदेव भट्ट तथा सदस्यहरू उमेश कोइराला र विदुर कोइरालाको इजलासले सोमबारदेखि लागू हुने गरी उनीहरूलाई थुनामा राख्न अनुमति दिएको अदालतका प्रवक्ता कृष्णशरण लामिछानेले जानकारी दिए।
राहदानी छपाइसम्बन्धी प्रक्रियामा भ्रष्टाचारजन्य कसुर भएको आशंकामा अनुसन्धान गरिरहेको अख्तियारले म्याद थपका लागि विशेष अदालतमा निवेदन दिएको थियो। उक्त निवेदनमाथि सुनुवाइ गर्दै अदालतले थप अनुसन्धानका लागि अर्याल र केसीलाई चार दिन हिरासतमा राख्न अनुमति दिएको हो।
अख्तियारले राहदानी छपाइ प्रकरणमा भएको भनिएको अनियमितताबारे थप अनुसन्धान गरिरहेको जनाएको छ।
