काठमाडाैँ । नेकपा (एमाले) का महासचिव शंकर पोखरेलले सूचना प्रविधिको तीव्र विकाससँगै पार्टीको प्रचार शैली रक्षात्मक (डिफेन्सिभ) बन्दै गएको स्वीकार गर्नुभएको छ।
सोमबार ललितपुरको च्यासलस्थित पार्टी केन्द्रीय कार्यालयमा आयोजित प्रचार तथा प्रकाशन विभागको जिम्मेवारी हस्तान्तरण कार्यक्रममा बोल्दै उहाँले पार्टीको प्रचार–प्रसार गतिविधि पछिल्ला वर्षहरूमा अपेक्षाकृत प्रभावकारी हुन नसकेको उल्लेख गर्नुभयो।
महासचिव पोखरेलका अनुसार विगतमा प्रचार कार्यमा प्रभावकारी देखिएको पार्टी अहिले प्रविधि प्रयोगको दक्षतामा पछि परेको छ। उहाँले पार्टी कार्यकर्ता प्रविधिको प्रयोगकर्ता मात्र बनेको तर आवश्यक दक्षता हासिल गर्न नसकेको बताउनुभयो।
उहाँले सामग्री निर्माण (कन्टेन्ट क्रिएसन) र लोकप्रिय डिजिटल प्लेटफर्महरूको प्रभावकारी उपयोगमा देखिएको खाडललाई पूर्नुपर्ने आवश्यकता औंल्याउनुभयो। साथै, पार्टीको प्रचार संयन्त्रलाई आधुनिक र प्रविधिमैत्री बनाउन विशेष ध्यान दिनुपर्नेमा उहाँले जोड दिनुभयो।
पोखरेलले भन्नुभयो, “पहिले हामी प्रचारको काममा प्रभावकारी थियौँ, तर पछिल्ला दिनमा हामी केही रक्षात्मक बनेका छौँ। यसको मुख्य कारण सूचना प्रविधिको तीव्र विकास र त्यसलाई प्रभावकारी रूपमा प्रयोग गर्न सक्ने नयाँ पुस्ताको बढ्दो प्रभाव हो।”
उहाँले थप भन्नुभयो, “हामी प्रविधिको प्रयोग त गरिरहेका छौँ, सामाजिक सञ्जालमा संलग्न पनि छौँ, तर हामी मुख्यतः प्रयोगकर्ता मात्र भएका छौँ। दक्षताको अभावका कारण हामी कम प्रभावकारी भएका हौँ।”
उहाँका अनुसार आजको सूचना–सञ्चार क्षेत्रमा प्रभावकारी बन्नका लागि सामग्री निर्माण र लोकप्रिय डिजिटल प्लेटफर्महरूको अधिकतम उपयोग गर्न सक्ने क्षमता आवश्यक छ। “जसले यो क्षमता विकास गर्न सक्छ, उही प्रभावकारी हुन्छ,” उहाँले भन्नुभयो।
महासचिव पोखरेलले पार्टीको प्रचार विभागले हालसम्म गरेका कामहरूको समीक्षा गर्दै आगामी दिनमा नयाँ रणनीति सहित अघि बढ्न निर्देशन पनि दिनुभएको छ।
