काठमाडौँ । पूर्वअर्थमन्त्री तथा नेकपा (माओवादी केन्द्र) का सांसद वर्षमान पुनले आगामी आर्थिक वर्ष २०८३/०८४ को बजेटमा अर्थ मन्त्रालयबाट बजेट चुहावट तथा हेरफेर भएको आरोप लगाउँदै त्यसबारे छानबिन गर्न संसदीय समिति गठन गर्न माग गरेका छन्।
प्रतिनिधिसभामा बोल्दै पुनले संसद्मा प्रस्तुत भइसकेको बजेटका विषयवस्तु परिवर्तन हुनु सामान्य विषय नभएको भन्दै यसबारे सूक्ष्म अध्ययन र अनुसन्धान आवश्यक रहेको बताए।
उनले अर्थमन्त्री डा. स्वर्णिम वाग्लेले पुराना फाइल खोल्ने अभिव्यक्ति दिएको उल्लेख गर्दै आफू अर्थमन्त्री रहेका समयदेखि नै सबै फाइलहरू छानबिन गर्न तयार रहेको बताए।
“पुरानाले गल्ती गरे भन्दै नयाँले पनि गल्ती गर्न पाइन्छ ? अर्थमन्त्रीले फाइल खोल्ने कुरा गर्नुभएको छ, खोलौँ, मेरै कार्यकालदेखि नै खोलौँ,” पुनले भने।
पुनले बजेट निर्माण प्रक्रियामा भएको भनिएको हेरफेरबारे सत्यतथ्य सार्वजनिक गर्न तत्काल संसदीय छानबिन समिति गठन गर्नुपर्ने माग गरे।
उनले पुराना सरकारका पालामा ६७ वटा हेरफेर भएको र आफूले सात वटा मात्र हेरफेर गरेको भन्ने आशयमा अर्थमन्त्रीले दिएको अभिव्यक्तिप्रति पनि आपत्ति जनाए। बजेट प्रक्रियामा भएको कुनै पनि प्रकारको अनियमितता निष्पक्ष छानबिनमार्फत स्पष्ट हुनुपर्ने उनको भनाइ थियो।
