काठमाडौं। अर्थमन्त्री डा. स्वर्णिम वाग्लेले विद्युतीय सवारीसाधनसम्बन्धी कर तथा नीतिगत व्यवस्थामा सूचना चुहावट गरेको भन्ने आरोप पुष्टि गर्न चुनौती दिनुभएको छ।
बिहीबार संसदको सार्वजनिक लेखा समितिको बैठकमा बोल्दै उहाँले आफूविरुद्ध लगाइएका आरोपहरू निराधार रहेको बताउनुभयो। नैतिकताको उच्च मापदण्ड कायम राख्दै सार्वजनिक जीवन बिताएको व्यक्तित्वमाथि नियोजित रूपमा प्रहार गर्ने र बदनाम गर्ने प्रयास भइरहेको भन्दै उहाँ भावुक समेत हुनुभयो।
उहाँले आफूले कुनै प्रकारको आर्थिक अनियमितता नगरेको दाबी गर्दै प्रमाण प्रस्तुत गर्न चुनौती दिनुभयो।
“दुई अर्ब होइन, दुई रुपैयाँ मात्र बेइमानी गरेको प्रमाण दिनुस्, म अर्थमन्त्री पद मात्र होइन, राजनीति र सम्पूर्ण सार्वजनिक जीवन नै त्याग्न तयार छु,” मन्त्री वाग्लेले भन्नुभयो।
उहाँले नैतिकताको विषयमा आफू दृढ रहेको उल्लेख गर्दै सार्वजनिक पदमा रहेका व्यक्तिहरूले पनि यस्तै जवाफदेहिता र उत्तरदायित्व प्रदर्शन गर्नुपर्ने धारणा राख्नुभयो।
हाल विद्युतीय गाडीसम्बन्धी नीतिगत निर्णय र सूचना चुहावटको विषयलाई लिएर विभिन्न आरोप–प्रत्यारोप भइरहेका बेला मन्त्री वाग्लेले समितिमार्फत आफ्नो स्पष्ट धारणा सार्वजनिक गर्नुभएको हो।
