काठमाडौँ । संघीय संसद्मा जारी अवरोध हटाउने उद्देश्यले राष्ट्रिय स्वतन्त्र पार्टीका सभापति रवि लामिछानेको पहलमा सोमबार बोलाइएको बैठकमा प्रमुख दलका शीर्ष नेताहरूको उपस्थिति अपेक्षाअनुसार देखिएन। प्रतिनिधि सभामा प्रतिनिधित्व गर्ने ६ दलमध्ये चार दलका शीर्ष नेतृत्वकर्ता बैठकमा अनुपस्थित रहे।
बैठकमा प्रमुख प्रतिपक्षी दल कांग्रेसका सभापति गगन थापा, एमाले अध्यक्ष केपी शर्मा ओली, नेकपा संयोजक पुष्पकमल दाहाल तथा श्रम संस्कृति पार्टीका अध्यक्ष हर्कराज राई सहभागी भएनन्।
यद्यपि, दलहरूको तर्फबाट दोस्रो तहका नेताहरू भने छलफलमा सक्रिय देखिए। कांग्रेसबाट संसदीय दलका नेता भीष्मराज आङ्देम्बे, एमालेबाट प्रमुख सचेतक ऐनबहादुर महर तथा नेकपाबाट सहसंयोजक माधवकुमार नेपाल र नेता वर्षमान पुन बैठकमा उपस्थित थिए।
यसबीच, राष्ट्रिय प्रजातन्त्र पार्टीका अध्यक्ष राजेन्द्र लिङ्देन भने बैठकमा प्रत्यक्ष सहभागी भएका थोरै शीर्ष नेतामध्ये एक बने।
संसदीय गतिरोध समाधानका लागि बोलाइएको बैठकमा शीर्ष नेतृत्वको अनुपस्थिति देखिए पनि दलहरूबीच संवादको प्रयास भने जारी रहेको संकेत देखिएको छ।
