काठमाडाैँ । उद्योगपति विनोद चौधरीले विगतमा सीमित समूहले स्रोत कब्जा गर्ने प्रवृत्तिको अन्त्य गर्न सरकारले लिएको नीति तथा प्रतिबद्धतालाई सकारात्मक कदमको रूपमा टिप्पणी गर्नुभएको छ। राजधानीमा आयोजित नेपाल उद्योग परिसंघको कार्यक्रममा बोल्दै उहाँले अब परियोजनाहरूलाई पारदर्शी र प्रतिस्पर्धात्मक ढंगले अगाडि बढाउने वातावरण निर्माण हुनुपर्ने बताउनुभयो।
उहाँले प्रशासनिक, कानुनी, न्यायिक तथा सार्वजनिक सेवा प्रवाहका क्षेत्रमा सुधारको प्रक्रिया अघि बढेको उल्लेख गर्दै ती सुधारलाई अझ तीव्र बनाउन आवश्यक रहेको बताउनुभयो। मुलुकमा सुधार र आशावादको वातावरण बने पनि त्यसलाई ठोस लगानी र परियोजनाको कार्यान्वयनमा रूपान्तरण गर्नुपर्ने आवश्यकता रहेको उहाँको भनाइ थियो।
ऊर्जा क्षेत्रको उदाहरण दिँदै चौधरीले विद्युत् खरिद–बिक्री सम्झौता (पीपीए) को प्रतीक्षामा रहेका हजारौँ मेगावाट क्षमताका परियोजनाहरू लामो समयदेखि रोकिएको बताउनुभयो। दुई महिनाभन्दा बढी समय बितिसक्दा पनि पीपीए प्रक्रिया अपेक्षित गतिमा अघि बढ्न नसक्दा ५ हजार मेगावाटभन्दा बढी क्षमताका परियोजना प्रभावित भएको उहाँले उल्लेख गर्नुभयो।
चौधरीले ऊर्जा उत्पादकहरूले लामो समयदेखि पीपीएका लागि पर्खिनुपरेको भन्दै सरकारले घोषणा गरेका नीति, सोच र प्रतिबद्धतालाई अब छिटो कार्यान्वयनमा लैजानुपर्नेमा जोड दिनुभयो। कार्यान्वयनको गति बढाउन सके मुलुकले अपेक्षित आर्थिक रूपान्तरण हासिल गर्न सक्ने उहाँको भनाइ थियो।
उहाँले पर्यटन क्षेत्रमा पनि सकारात्मक संकेत देखिन थालेको उल्लेख गर्दै पछिल्लो समय प्रस्तुत भएका नीतिगत दृष्टिकोण र एजेन्डाहरूलाई राष्ट्रिय तथा अन्तर्राष्ट्रिय स्तरमा सकारात्मक रूपमा लिइएको बताउनुभयो। यस्ता पहलहरूले मुलुकलाई विकासको मार्गमा अगाडि बढाउन सहयोग पुग्ने उहाँको विश्वास छ।
निजी क्षेत्र लगानीका लागि पूर्ण रूपमा तयार रहेको बताउँदै चौधरीले नेपालमा लगानीयोग्य पूँजी अर्थात् तरलताको अभाव नरहेको र काम गर्न चाहने जनशक्तिको पनि कमी नभएको बताउनुभयो। मुलुकमा देखिएको सकारात्मक परिवर्तनले क्षेत्रीय तथा अन्तर्राष्ट्रिय स्तरमा आशा जगाएको तथा ठूला अन्तर्राष्ट्रिय कम्पनीहरू नेपालमा लगानी र नयाँ परियोजना अघि बढाउन इच्छुक देखिएको उहाँले बताउनुभयो।
