काठमाडौं । पूर्वप्रधानमन्त्री सुशीला कार्कीले सरकारले विपक्षी दललाई समाप्त पार्ने मानसिकताबाट अघि बढ्न नहुने बताउनुभएको छ ।
शुक्रबार काठमाडौंमा आयोजित एक कार्यक्रममा बोल्दै उहाँले सत्तामा पुगेपछि अर्को पक्षलाई पूर्ण रूपमा निषेध वा कमजोर बनाउने प्रवृत्ति लोकतान्त्रिक अभ्यासका लागि सही नहुने धारणा राख्नुभयो ।
पूर्वप्रधानमन्त्री कार्कीले प्रधानमन्त्री बालेन्द्र साह र सत्तारुढ राष्ट्रिय स्वतन्त्र पार्टीका नेताहरुलाई इतिहासबाट पाठ सिक्दै अघि बढ्न सुझाव दिनुभयो । उहाँका अनुसार नयाँ पुस्ताका नेताहरूले विगतका अनुभव, राजनीतिक इतिहास र राज्य सञ्चालनको अभ्यासलाई मनन गर्न आवश्यक छ ।
उहाँले भन्नुभयो, युवा पुस्ता नेतृत्वमा आए पनि उनीहरूले दीर्घकालीन दृष्टिकोण राखेर मुलुक सञ्चालन गर्नुपर्ने उल्लेख गर्दै “सबै पुस्ता समयसँगै परिवर्तन हुँदै जान्छ” भन्ने कुरा बुझ्नुपर्नेमा जोड दिनुभयो । साथै, सत्तामा पुगेपछि विपक्षीलाई पूर्ण रूपमा कमजोर पार्ने वा समाप्त गर्ने सोच लोकतान्त्रिक संस्कृतिसँग मेल नखाने उहाँको भनाइ थियो ।
कार्कीले राजनीतिक दलहरूबीच प्रतिस्पर्धा स्वाभाविक भए पनि त्यसलाई शत्रुतापूर्ण रूपमा होइन, सभ्य आलोचना र मार्गदर्शनका रूपमा लिनुपर्ने बताउनुभयो । विपक्षी दलले सरकारका कमजोरी औंल्याउने कार्यलाई ‘रचनात्मक भूमिका’ का रूपमा बुझ्नुपर्ने उहाँको धारणा थियो ।
उहाँले जनताले दिएको मतको सम्मान गर्दै सरकारलाई काम गर्न दिने वातावरण बनाउनुपर्नेमा पनि जोड दिनुभयो । साथै, सबै राजनीतिक दलहरूबीचको प्रतिस्पर्धाले नै मुलुकलाई अघि बढाउन मद्दत गर्ने उहाँले बताउनुभयो ।
कार्यक्रममा पूर्वप्रधानमन्त्री कार्कीले निर्वाचन सम्पन्न गराउन भूमिका खेलेको भन्दै कायममुकायम प्रमुख निर्वाचन आयुक्त रामप्रसाद भण्डारीको प्रशंसा पनि गर्नुभयो ।
