एक लाख ५९ हजार तीन सय रुपैयाँ सहित म्यारिज खेलिरहेको अवस्थामा आठजना पक्राउ
काठमाडाैंः प्रधानमन्त्री केपी शर्मा ओलीको सुरक्षा टोलीका वरिष्ठ सुरक्षा अधिकारी नेपाली सेनाका मेजर (सेनानी) राजेन्द्र शाहीलाई प्रहरीले शुक्रबार साँझ तास खेलिरहेको अवस्थामा काठमाडौंको सामाखुसीबाट पक्राउ गरेको छ।
महानगरीय प्रहरी प्रभाग गोंगबुबाट खटिएको प्रहरी टोलीले सामाखुसीस्थित सोमबहादुर मगरको घरबाट शाहीसहित आठ जनालाई नियन्त्रणमा लिएको हो । पक्राउ परेका अन्यमा घरधनी मगर, रामेछापका बुद्धिलाल मगर, गोरखाका जित गुरुङ र किरणजंग शाह, टोखाका मानकाजी गुरुङ र धर्म शाह तथा सुर्खेतका रिनज राणा रहेको प्रहरीले जनाएको छ ।
पक्राउ परेकाहरुको साथबाट एक लाख ५९ हजार रुपैयाँ पनि बरामद भएको छ । उनीहरूलाई हिरासतमा राखी कारबाही प्रक्रिया अघि बढाइएको महानगरीय प्रहरी वृत्त महाराजगन्जका डिएसपी उमेश लम्सालले बताए । उनीहरू म्यारिज खेलिरहेको अवस्थामा पक्राउ परेको प्रहरीले जनाएको छ ।
प्रधानमन्त्रीको सुरक्षामा लेफ्टिनेन्ट कर्णेल (प्रमुख सेनानी)को नेतृत्वमा सैनिक टोली खटिएको हुन्छ । मेजर शाही शुक्रबार बिदामा थिए । बिदाको वेला उनी सधैँजसो जुवातास खेल्ने गरेको अनुसन्धानबाट खुलेको छ । शाहीलाई सैनिक प्रहरी समक्ष बुझाउने प्रहरीको तयारी छ । कर्तव्य ज्यान, लागुऔषधलगायत केही गम्भीर किसिमका अपराधबाहेक अन्य अपराधमा संलग्न सैनिकलाई सेनाले नै आन्तरिक कारबाही तथा कैद सजाय गर्ने कानुनी व्यवस्था छ । नयाँ पत्रिका दैनिकबाट
