काठमाडौँ । प्रतिनिधिसभाअन्तर्गतको सार्वजनिक लेखा समितिको आजका लागि तय गरिएको बैठक आवश्यक गणपूरक संख्या (कोरम) नपुग्दा सुरु नै नभई स्थगित भएको छ ।
समिति सभापति भरतबहादुर खड्काले सांसदहरूको उपस्थिति न्यून भएपछि बैठक सञ्चालन गर्न नसकिएको जानकारी दिँदै तत्कालका लागि कार्यक्रम रोकिएको बताएका छन् ।
उनका अनुसार राष्ट्रिय स्वतन्त्र पार्टी (रास्वपा) ले जिल्लास्तरीय चुनावी गतिविधि सञ्चालन गरिरहेकाले त्यसका सांसदहरू अनुपस्थित रहेकाले कोरम पुर्याउन कठिन भएको हो । साथै, सदनमा देखिएको पछिल्लो परिस्थितिले पनि सदस्यहरूको उपस्थितिमा असर पारेको उनले उल्लेख गरे ।
सभापति खड्काले बैठक बस्दै नबसी स्थगित गर्नुपरेको भन्दै अर्को सूचना जारी नभएसम्मका लागि कार्यक्रम रोकिएको बताए । उनले आगामी सदन २५ गतेका लागि बोलाइएको र त्यसपछि २६ वा २७ गतेतिर समिति बैठक पुनः तय गर्ने तयारी भइरहेको पनि जानकारी दिए, यद्यपि अन्तिम मिति भने तय भइसकेको छैन ।
आजको बैठकमा लेखा उत्तरदायी अधिकृतहरूसँग बेरुजु न्यूनीकरणका उपाय र समितिको आन्तरिक कार्यविधि सम्बन्धी विषयमा छलफल गर्ने कार्यसूची तय गरिएको थियो ।
