काठमाडाैं: फुटबल इतिहासमा विश्वकप सबैभन्दा ठूलो र प्रतिष्ठित प्रतियोगिता हो । यस प्रतियोगितामा सहभागी हुन, नाम लेखाउन र आफूमा रहेको कला देखाउन सबैजसो खेलाडीले प्रयास गरिरहेका हुन्छन् । अमेरिका, मेक्सिको र क्यानडाले संयुक्त रुपमा आयोजना गर्ने फिफा विश्वकप फुटबल–२०२६ मा पनि केही चर्चित खेलाडीको नाममा खेलप्रेमीहरुको विशेष ध्यान गएको छ ।
उनीहरुका खेल कौशल वर्षौंदेखि देखिए पनि हरेक खेलमा उनीहरुका पक्षमा खेलप्रेमीहरु झुम्मिएकै हुन्छन् । आफ्नो प्रिय खेलाडीले राम्रो खेलोस् भनेर व्यग्रतापूर्वक खेलप्रेमीहरु प्रतिक्षारत हुन्छन् । यस पटक पनि त्यही क्रम पुनरावृत्ति हुनु अनौठो होइन । अहिले सबैको नजर यी यस्तै अदभूत खेलाडीमै सोझिएको छ । कतिपय खेलाडी पाका भइसके पनि उनीहरुलाई हेर्न अझै पनि दर्शकमाझ तँछाडमछाड नै छ ।
उनीहरुका फ्यान जर्सी लगाएर मैदानमा उत्रने मात्र होइन, विश्वभर सानाठूला सबै उमेर समूहका व्यक्तिहरु जर्सी लगाएर टेलिभिजन सेट अघिल्तिर, रेस्टुराँ, होटल र पार्कमा भेला हुनेछन् ।
यस पटकको विश्वकपमा यी १० खेलाडी सर्वाधिक हेर्नलायक खेलाडीका रूपमा रहेका छन् ।
१. लियोनेल मेसी
लियोनेल मेसीले चार वर्षअघि कतारमा अर्जेन्टिनालाई विश्वकप जिताउँदै आफ्नो खेल जीवनको सबभन्दा ठुलो सपना पूरा गरेका थिए । मेसीले विश्वकप ट्रफीका लागि १८ वर्ष पर्खिए । कतार विश्वकपलाई मेसीकै विश्वकपका रूपमा सम्झना गरिने छ । मेसीले क्लब, देश र व्यक्तिगत रूपमा लगभग सबै प्रमुख उपाधि जितिसकेका छन् । उनी अहिले डिएगो म्याराडोना र पेले सरह सर्वकालीन महान् फुटबलर हुन् कि होइनन् भन्ने बहस जारी छ । मेसीले लगातार दोस्रो पटक विश्वकप जितेमा उनको सो दाबी अझ बलियो हुने छ । मेसी अहिले विश्वकप आयोजक अमेरिकाकै इन्टर मियामी सिएफबाट खेलिरहेका छन् ।
२. क्रिस्टियानो रोनाल्डो
विश्व फुटबलमा लियोनेल मेसीसँगै यस पुस्ताका सर्वश्रेष्ठ खेलाडी मानिएका क्रिस्टियानो रोनाल्डोलाई विश्वकप ट्रफीले लोभ्याइरहेको छ । विश्वकप बाहेक आफ्नो सङ्ग्रहमा प्राय: सबै ट्रफी जम्मा गरिसकेका ४१ वर्षीय रोनाल्डोलाई विश्वकप जित्ने अन्तिम अवसर छ । उनको गौरवशाली खेल जीवनमा छुटेको एक मात्र ठुलो उपाधिको खोजीमा रोनाल्डो छैटौँ पटक विश्वकप खेल्दैछन् । उनको सङग्रहमा पाँच च्याम्पियन्स
लिग उपाधि र एक युरोपियन च्याम्पियनसिप ट्रफी तथा दुई पटक नेसन्स लिग उपाधि रहेका छन् । पाँच पटक बालन डी ओर जितिसकेका रोनाल्डो सर्वाधक अन्तर्राष्ट्रिय गोल (१४३) गर्ने खेलाडी पनि हुन् । यद्यपि रोनाल्डोको उपाधि जित्न भोक अलिकति पनि कम भएको छैन । पोर्चुगलका कप्तान रोनाल्डो अल नासर एफसीलाई साउदी लिगको उपाधि दिलाएर विश्वकपमा प्रवेश गर्दैछन् ।
३. किलियन एम्बापे
एम्बापेलाई लामो समयदेखि मेसी र रोनाल्डोपछि विश्वकै उत्कृष्ट खेलाडी बन्ने सम्भावित उत्तराधिकारी मानिँदै आएको छ । उनले १९ वर्षकै उमेरमा फ्रान्सलाई
विश्वकप दिलाएका छन् । पछिल्लो संस्करणको फाइनलमा एम्बापेले ह्याट्रिक गरेर पनि फ्रान्सलाई जिताउन सकेनन् । छिटो दौडने र गोलपोस्टमा सटिक प्रहार गर्ने उनी पछिल्लो विश्वकपमा गोल्डेन बुट जित्ने खेडाली थिए । विश्वकप विजेता र अन्य धेरै उपाधि जितिसकेको भए पनि एम्बापेले अझै च्याम्पियन्स लिग र बालोन डी ओर हासिल गर्न सकेका छैनन् । त्यसैले पनि उनलाई यस पुस्ताका सर्वश्रेष्ठ खेलाडीमध्ये एक मान्नेमा नै प्रश्न उठ्ने गरेको छ । यसपालि फ्रान्सलाई फेरि विश्वकप दिलाउन सकेमा एम्बापे यस वर्षको बालोन डी ओर जित्ने बलियो दाबेदार बन्न सक्नेछन् ।
४. एर्लिङ हालान्ड
म्यान्चेस्टर सिटीका नर्बेजियाली स्ट्राइकर एर्लिङ हालान्ड पहिलो पटक विश्वकप फुटबल प्रतियोगिता खेल्दैछन् । हालान्ड अहिलेका विश्वकै उत्कृष्ट स्ट्राइकरभन्दा फरक पर्दैन । उनले प्रिमियर लिगमा म्यान्चेस्टर सिटीका लागि पछिल्ला चार वर्ष हरेक सत्र ३० भन्दा बढी गोल गरेका छन् । अग्लो कदका हालान्डले नर्वेको जर्सीमा पनि ५५ गोल गरिसकेका छन् । हालान्डलाई पनि थाहा छ, यस पटकको विश्वकपमा नर्वेको छवि उच्च पार्न सबभन्दा ठुलो जिम्मेवारी उनकै हुनेछ । हालान्ड यस विश्वकपको सबैभन्दा घातक फरवार्डमध्ये एक हुनेमा कुनै द्विविधा छैन ।
५. लामिन यमाल
स्पेनका किशोर उमेरका फरवार्ड यमालले सन् २०२४ मा स्पेनलाई युरापेली च्याम्पियन बनाउन महत्वपूर्ण भूमिका खेलेर आफ्नो क्षमता देखाइसकेका छन् । १८ वर्षीय यमाल अझ अनुभवी भएर विश्वकप खेल्दैछन् । तीव्र गति, उत्कृष्ट ड्रिब्लिङ र सिर्जनशील खेल शैलीका कारण यमालको तुलना मेसीसँग हुने गर्दछ । भविष्यमा मेसी र रोनाल्डोले छोड्ने खाली स्थान भर्ने सबैभन्दा सम्भावित खेलाडी यमाल हुनेछन् ।
६. उस्मान डेम्बेले
हालका बालोन डी ओर विजेता उस्मान डेम्बेले लगातार च्याम्पियन्स लिग विजेता बनेर विश्वकप खेल्दैछन् । तीन वर्षअघि फ्रान्सेली क्लब पेरिस सेन्ट जर्मेन (पिएसजी) मा आबद्ध भएपछि फ्रान्सका यी फरवार्ड गजबले विश्व फुटबलको उचाइमा पुगेका छन् । उनकै उपस्थितिले पनि फ्रान्सलाई उपाधिको प्रमुख दाबेदारका रूपमा लिइएको छ ।
७. नेमार
नेमारले आफ्नो खेल जीवनमा ब्राजिललाई धेरै खेल जिताएका छन् । यद्यपि ब्राजिललाई छैटौँ विश्वकप दिलाउने सपना अझै पूरा भएको छैन । ३४ वर्षीय नेमारले चौथो पटक विश्वकप खेल्न लागेका हुन् ।
नेमार ब्राजिलका सर्वाधिक गोलकर्ता पनि हुन् । उनले ब्राजिलको जर्सीमा ७९ गोल गरिसकेका छन् । नेमार फिटनेसका कारण टिममा नपर्ने हल्ला थियो तर हाल ब्राजिलको कमजोर प्रदर्शनपछि प्रशिक्षक कार्लो एन्सोलेटीले अन्तिम समयमा नेमारलाई विश्वकप टोलीमा समावेश गरेका थिए ।
८. मोहम्मद सलाह
लिभरपुलबाट खेल्ने मोहम्मद सलाह इजिप्टका आदर्श फुटबलर हुन् । उनले इजिप्टका लागि ४४२ खेलमा २५७ गोल गरेका छन् । च्याम्पियन्स लिग तथा दुई प्रिमियर लिग उपाधि सलाहको सङ्ग्रहमा रहेका छन् । इजिप्टका समर्थकले विश्वकपमा सलाह उत्कृष्ट प्रदर्शनको अपेक्षा गरिरहेका छन् । यससत्र लिभरपुल प्रशिक्षकसँगका केही असमझदारीका कारण खेलप्रतिभा देखाउन नसकेका सलाहले गत सत्र भने इङ्ग्लिस प्रिमियर लिगमा गोल्डेन बुट जितेर सानदार लयमा देखिएका थिए । गत विश्वकपमा सलाहको टिम इजिप्ट प्ले अफमा सेनेगलसँग टाइब्रेकरमा हारेपछि विश्वकपमा चयन हुन सकेको थिएन । पेनाल्टीमा गोल गर्न नसक्ने खेलाडी सलाह नै थिए । त्यसैले पनि सलाहले यस विश्वकपमा सो पीडा भुलाउन प्रयास गर्नेछन् ।
९. ह्यारी केन
विश्वकपमा अभागी टिमको नाम लिनुपर्दा इङल्यान्डलाई लिइन्छ । इङल्यान्डमा फुटबल खेलका लागि धेरै लगानी र खेलाडी रहे पनि विश्वकपमा सोचेजस्तो नतिजा हासिल भइरहेको छैन । कैयौं वर्षदेखि विश्वकप उपाधि जित्ने सम्भावना र प्रतिभावान खेलाडी भएर पनि त्यो सपना पुरा भएको छैन । यसपटक इङल्यान्डको टिममा कप्तान ह्यारी केन छन् । जर्मन क्लब बायर्न म्युनिखका सर्वाधिक सफल खेलाडीका रुपमा रहेका ह्यारी केनबाट इङल्यान्डले केही आशा गरेको छ ।
१०. क्रिस्टियन पुलिसिच
पुलिसिचलाई अमेरिकी फुटबलको सुपरस्टार खेलाडी हुन् । उनीसँग जर्मनी, इङ्ग्ल्यान्ड र इटालीका ठुला क्लबमा खेलेको अनुभव छ । चेल्सीमा आबद्ध हुँदा पुलिसिचको टिम च्याम्पियन्स लिग उपाधि जित्न सफल भएको थियो । पुलिसिच हाल इटालीको ठुलो क्लब एसी मिलानमा आबद्ध छन् । त्यसैले घरेलु भूमिमा हुने विश्वकपमा पुलिसिच अमेरिकी टोलीका मुख्य आशाका रूपमा रहने छन् ।
माथिका १० खेलाडीबाहेक, ब्राजिलका भिनिसियस जुनियर (ब्राजिल), लुइस डियाज (कोलम्बिया), जुलियन अल्भारेज (अर्जेन्टिना) समेत अनेक सर्वश्रेष्ठ र प्रतिभावान खेलाडी यस विश्वकपमा खेल्दैछन् । (गोरखापत्र र एजेन्सीको सहयोगमा)
