काठमाडाैँ । पूर्वगृहमन्त्री तथा राष्ट्रिय स्वतन्त्र पार्टी (रास्वपा)का सांसद सुधन गुरुङमाथि छानबिन गर्न गठन गरिएको समितिको म्याद पाँच दिन थप गरिएको छ।
सरकारले समितिलाई दिइएको प्रारम्भिक समयसीमा सोमबार समाप्त भएको थियो। समय सकिनुअघि नै समितिले काम सम्पन्न गर्न नसकिएको जनाउँदै म्याद थपका लागि सरकारसमक्ष अनुरोध गरेको थियो।
समितिका अध्यक्ष अच्युतप्रसाद भण्डारीका अनुसार अब थपिएको पाँच दिनको अवधि आजदेखि लागू भएको छ। उनले बाँकी अनुसन्धान कार्यलाई तीव्रता दिँदै निर्धारित समयमै प्रतिवेदन बुझाइने बताए।
समितिले यसअघि नै पूर्वगृहमन्त्री गुरुङसँग बयान लिइसकेको छ भने उनीसँग सम्बन्धित विभिन्न कागजात तथा प्रमाणहरू सरकारी निकायबाट संकलन गरिसकिएको छ। यद्यपि, केही थप प्रमाणहरू अझै संकलनको प्रक्रियामा रहेको समितिले जनाएको छ। आवश्यक विवरण माग गर्दै सम्बन्धित निकायहरूलाई पुनः पत्राचारसमेत गरिएको छ।
गत वैशाख २८ गते सरकारको निर्णयअनुसार उच्च अदालतका पूर्वन्यायाधीश अच्युतप्रसाद भण्डारीको संयोजकत्वमा तीन सदस्यीय छानबिन समिति गठन गरिएको हो। समितिमा महालेखा नियन्त्रक शोभाकान्त पौडेल र महान्यायाधिवक्ता कार्यालयका सहन्यायाधिवक्ता अच्युतमणि न्यौपाने सदस्य रहेका छन्।
समितिलाई गुरुङको सम्पत्ति विवरण, हिरासतमा रहेका व्यवसायी दीपक भट्ट संलग्न कम्पनीको सेयर, हदबन्दीभन्दा बढी जग्गा तथा अन्य विवादित जग्गासम्बन्धी विषयमा अनुसन्धान गर्ने जिम्मेवारी दिइएको छ।
गुरुङ गत चैत १३ गते गृहमन्त्री नियुक्त भएका थिए। सम्पत्ति विवरण सार्वजनिक भएपछि उनी विवादमा तानिएका थिए र बढ्दो विवादका बीच उनले गत वैशाख ९ गते पदबाट राजीनामा दिएका थिए।
