काठमाडौं । पंण्डित नवराज शारदा स्मृति समाजले तीन जना छात्रालाई शैक्षिक छात्रवृत्ति प्रदान गरेको छ ।
पंण्डित नवराज पौडेलको १०७ औँ जन्मजयन्तीको अवसरमा आयोजित कार्यक्रममा छात्रवृत्ति प्रदान गरिएको हो । समाजका अध्यक्ष निर्मलराज पौडेलले हरेक वर्ष उहाँको स्मृतिमा कुनै न कुनै रूपमा सामाजिक कार्य गर्दै आएको र सोही प्रतिबद्धताअनुसार यस वर्ष पनि छात्रवृत्ति प्रदान गरिएको जानकारी दिनुभयो ।
कार्यक्रममा योगी नरहरीनाथ आध्यात्मिक परिषद्का अध्यक्ष शंकरराज पौडेलले समाजले गर्दै आएको सामाजिक कार्यको प्रशंसा गर्दै यस्ता गतिविधि निरन्तर अघि बढाउन आग्रह गर्नुभयो ।
समाजका अनुसार संस्कार, कर्मकाण्ड, सामाजिक मूल्य–मान्यता तथा सांस्कृतिक जागरणका विषयमा जनचेतनामूलक कार्यक्रमहरू गर्दै आइरहेको छ ।
