काठमाडौं: सर्वोच्च अदालतका न्यायाधीश तिलप्रसाद श्रेष्ठले आफू भारतको नयाँदिल्ली स्थित राजीव गान्धी क्यान्सर इन्स्टिच्यूट एन्ड रिसर्च अस्पतालमा बोनम्यारो समस्यालाई लिएर उपचार गराइरहेको बताउनुभएको छ ।
न्यायाधीश श्रेष्ठले आज एक विज्ञप्ति जारी गर्दै आफ्नो उपचारमा चासो, चिन्ता, स्वास्थ्यलाभ र सदभाव व्यक्त गर्नुहुने सबैप्रति अनुगृहित रहेको बताउनु भएको छ ।
उहाँले विज्ञप्तिमा भन्नुभएको छ, “मेरा शुभेच्छुक एवं शुभचिन्तकहरुले मेरो उपचारका सन्दर्भमा स्वस्फूर्त रुपमा सहयोग जुटाउने हेतुले रकम सङ्कलन गर्न थाल्नु भएको खबर पनि पाएको छु ।”
न्यायसेवा अधिकृत समाजले न्यायपालिकामा कार्यरत सम्पूर्ण राष्ट्रसेवक कर्मचारीलाई स्वेच्छिक रुपमा यथाशक्य आर्थिक सहयोग गर्न आह्वान गरेको पनि थाहा पाएको बताउँदै न्यायाधीश श्रेष्ठले यो आर्थिक सङ्कलनको कार्य स्थगित गरिदिनु हुन सबैमा विनम्र अनुरोध गर्नुभएको छ ।
उहाँले भन्नुभएको छ, “आशा छ, तपाईंहरुले मेरो अनुरोधलाई स्वीकार गरी रकम सङ्कलनको कार्य स्थगित गर्नु हुनेछ ।”
