काठमाडौँ।नेपाल र रोमानियाबीचको द्विपक्षीय व्यापार, वैदेशिक लगानी र औद्योगिक सहयोगलाई सुदृढ बनाउन नयाँ क्षेत्रहरूमा सहकार्य गर्ने सहमति भएको छ ।
नेपाल तयारी पोशाक उद्योग संघका अध्यक्ष पशुपतिदेव पाण्डेले दुई देशबीचको आर्थिक सम्बन्धलाई थप प्रभावकारी बनाउन व्यापारिक प्रोटोकलमा हस्ताक्षर भएको जानकारी दिनुभएको हो ।
सम्झौताअनुसार दुई देशबीच व्यापार आदानप्रदान, पूर्वाधार विकासका लागि वैदेशिक प्रत्यक्ष लगानी (एफडीआई), सीप विकास तथा प्राविधिक तालिम, ई–कमर्स, सूचना प्रविधि र बजारीकरण जस्ता महत्वपूर्ण क्षेत्रमा सहकार्य गरिनेछ ।
यसले नेपाल र रोमानियाका व्यवसायीहरूबीच व्यावसायिक सम्बन्ध र उपभोक्ता सम्बन्धलाई थप सहज बनाउने लक्ष्य राखेको छ ।
अध्यक्ष पाण्डेकाअनुसार आर्थिक वर्ष २०२४/२५ मा नेपालले रोमानियातर्फ करिब ११ लाख ७० हजार अमेरिकी डलर बराबरको वस्तु निर्यात गरेको छ ।
सोही अवधिमा रोमानियाबाट करिब ६ लाख ९० हजार अमेरिकी डलर बराबरको आयात भएको छ । नेपालबाट रोमानिया निर्यात हुने प्रमुख वस्तुमा तयारी पोशाक पहिलो स्थानमा रहेको छ ।
यद्यपि हालको व्यापार परिमाण सानो देखिए तापनि यसले युरोपेली बजारमा नेपाली तयारी पोशाकको उच्च सम्भावना र बढ्दो आपसी चासोलाई स्पष्ट पारेको पाण्डेले बताउनु भयो । रोमानियालाई उदाउँदो युरोपेली बजार र वृहत्तर युरोपेली क्षेत्रको प्रवेशद्वारका रूपमा उल्लेख गर्नुभयो ।
अध्यक्ष पाण्डेले भन्नुभयो, ‘हाम्रा संस्था, व्यवसायी र सरकारबीचको निरन्तर सहकार्यले आगामी वर्षहरूमा द्विपक्षीय लगानी र व्यापारलाई उल्लेख्य रूपमा वृद्धि गर्न सकिन्छ । प्रविधि हस्तान्तरण, संयुक्त लगानी र बलियो व्यावसायिक सञ्जालमार्फत नेपालले युरोपेली बजारमा आफ्नो पकड बलियो बनाउनुपर्छ ।’
दुई देशबीचको व्यापारिक गतिविधिलाई संस्थागत रूपमा अगाडि बढाउन ‘नेपाल–रोमानिया उद्योग वाणिज्य संघ’ स्थापना गर्ने निर्णय समेत भएको छ । यो संघले दुई देशको अर्थतन्त्रलाई जोड्न र व्यापारिक गाँठो फुकाउन सक्रिय भुमिका खेल्ने विश्वास लिइएको छ ।
अध्यक्ष पाण्डेले नेपाली उत्पादनको गुणस्तर सुधार र अन्तर्राष्ट्रिय मापदण्डको पालनाले युरोपेली बजारमा प्रतिष्पर्धात्मक क्षमता बढ्ने उल्लेख गर्नुभयो ।
साथै, रोमानियाको विकासमा नेपाली श्रमिकहरूले पुर्याएको योगदानको प्रशंसा गर्दै उनले यस सहकार्यले औद्योगिक वृद्धि, रोजगारी सिर्जना र जनस्तरको सम्बन्धलाई समेत नयाँ उचाइ दिने बताउनु भयो ।–न्युज एजेन्सी नेपाल
