दमौली । जिल्लाको देवघाट गाउँपालिका–५ मा सञ्चालित धर्मार्थ अस्पतालबाट चौबिसै घण्टा सेवा सञ्चालन गरिएको छ । दिवा सेवा मात्रै सञ्चालन हुँदै आएको उक्त अस्पतालमा आइतबारबाट चौबिसै घण्टा सेवा सञ्चालन गरिएको हो ।
गलेश्वर आश्रमले विसं २०५७ देखि सञ्चालन गर्दै आएको उक्त अस्पताल गत वर्ष साउन १ गते देवघाट गाउँपालिकालाई हस्तान्तरण भएको थियो । आश्रममा रहेका ज्येष्ठ नागरिक, बालबालिका, तीर्थयात्री तथा स्थानीय समुदायलाई दिवा सेवा प्रवाह गर्दै आइरहेको अस्पतालबाट अब चौबिसै घण्टा सेवा सञ्चालन गरिने अस्पतालका प्रमुख प्रदीप बुढाथोकीले जानकारी दिनुभयो । बुढाथोकीका अनुसार आइतबारबाटै अस्पतालमा प्रयोगशाला सेवा पनि शुरु भएको छ । प्रयोगशाला सेवा शुरु भएसँगै इसिजी, भिडियो एक्स–रे गर्न सर्वसाधारणलाई चितवन जान नपर्ने भएको छ ।
अस्पतालले चितवनस्थित मेडिकल कलेजसँग प्राविधिक सहयोगका लागि सम्झौता गरेको छ । सम्झौताबमोजिम मेडिकल कलेजका एक जना एमबिबिएस डाक्टरले अस्पतालमा सर्वसाधारणको स्वास्थ्य परीक्षण गर्नेछन् । बुढाथोकीका अनुसार अस्पतालले विसं २०८२ सम्म मेडिकल कलेजसँग प्राविधिक सहयोगका लागि सम्झौता गरेको छ ।
उक्त अस्पतालमा आठ स्वास्थ्यकर्मी छन् । दरबन्दी थप्न मन्त्रालयमा माग गरिएको छ । अस्पतालबाट हाल दैनिक औसत ४५ जनाले स्वास्थ्य सेवा लिइरहेका छन् । गाउँपालिकाका अध्यक्ष दुर्गबहादुर थापाले अस्पताललाई सुविधायुक्त बनाउन पहल भइरहेको जानकारी दिनुभयो । थापाका अनुसार १५ श्ययाको अस्पताललाई स्तरोन्नति गरी २५ श्ययाको बनाउन पहल भइरहेको छ । १० रोपनी क्षेत्रफलमा फैलिएको उक्त अस्पतालसँगै जग्गा, यसका अन्य भौतिक संरचनाहरु र सबै चल/अचल सम्पत्ति गत वर्ष गाउँपालिका मातहत आएको थियो ।
