काठमाडौँ । आगामी हप्ता लगातार ४ दिन सरकारी विदा परेको छ । यही जेठ १४ गतेदेखि ४ दिन लगातार सार्वजनिक बिदा परेको हो ।
नेपाल सरकारले गणतन्त्र दिवस यही जेठ १५ गते विदा दिने भएकाले तीन दिन त यसअघि पनि परेकै थियो, किनभने १६ र १७ गते शनिबार र आइतबार परेको छ ।
गृह मन्त्रालयले बिहीबार जेठ १४ गते बकर ईद (ईद–उल–अज्हा)को अवसरमा बिदा दिने निर्णय भएको जानकारी विज्ञप्ति निकालेर आज दिएकोले अब लगातार ४ दिन नै विदा परेको हो ।
गृह प्रवक्ता आनन्द काफ्लेले जारी गरेको विज्ञप्तिमा राजपत्रमा प्रकाशित सूचना अनुसार इश्लाम धर्मालम्बीहरूको बकर ईद (ईद–उल–अज्हा) को दिन सार्वजनिक बिदा दिने व्यवस्था रहेको र १४ गते सो चाड रहेकोले बिदा दिने निर्णय भएको जानकारी दिएका छन् ।
त्यसको भोलिपल्ट अर्थात् जेठ १५ गते गणतन्त्र दिवसको बिदा दिने यसअघि नै राजपत्रमा प्रकाशित छ । १६ गते शनिबार र १७ गते आइतबार यसै पनि सार्वजनिक बिदा हुने गर्दछ । यसकारण यही १४ देखि १७ गतेसम्म ४ दिनसम्म लगातार सरकारी कार्यालयहरु विदा हुने भएका हुन् ।
