काठमाडौं । सम्पत्ति शुद्धीकरण अनुसन्धान विभागले ‘क्यासिनो किङ’ भनेर चिनिने गुन्डा नाइके बलराम सापकोटा ‘बले’सहित २५ जनालाई नियन्त्रणमा लिएको छ। सोमबार जिल्ला प्रशासन कार्यालय काठमाडौंबाट जुवा ऐनमा मुद्दा चलाइएका बलेसहित २५ जना ‘हाइप्रोफाइल’ जुवाडे धरौटीमा छुटेका थिए।
सोमबार प्रहरीकै हिरासतमै राख्न लगाएर विभागले मंगलबार बलेसहित २५ जनालाई नै महानगरीय प्रहरी वृत्त महाराजगन्जबाट विभागले आफ्नो कार्यालयमा लगेको छ।
विभाग स्रोतका अनुसार उनीहरूले जुवा खेल्दा अस्वाभाविक सम्पत्ति देखिएकोले त्यसको स्रोतको अनुसन्धान गर्न नियन्त्रणमा लिएको हो।
विभाग स्रोतका अनुसार अब उनीहरूलाई अदालतबाट म्याद थप गरी हिरासतमा राखिन्छ।
यसरी बुझाइएकामा सोभित सिलवाल, प्रदीप बोगटी, रामकृष्ण केसी, इन्दु श्रेष्ठ, रञ्जन राजवंशी, सीताराम खड्का, रोशन तामाङ, राम तामाङ, कृष्ण भण्डारी, सुमन गुरुङ, सुमन अग्रवाल, सोदेल कार्की, पवन अग्रवाल, पवित्रकुमार कार्की, मुक्ति लामा, भक्त तामाङ, शम्भु बुढाथोकी, प्रेम थापामगर, अशोक श्रेष्ठ, हलामप्रसाद पराजुली, बुद्ध लामा, थम्कु शेर्पा, नवाङ लामालगायत छन्।