काठमाडौं । अमरेशकुमार सिंह राष्ट्रिय स्वतन्त्र पार्टी (रास्वपा) का तर्फबाट सर्लाही ४ बाट निर्वाचित सांसद हुन् । उनी गत फागुनको निर्वाचन ताकाका एक चर्चित उम्मेदबार पनि हुन् । चर्चित यसकारण कि उनी नेपाली कांग्रेसका सभापति गगन कुमार थापा विरुद्ध चुनाव उठेका थिए ।
पछि गगनलाई पनि हराएपछि उनी झन् चर्चित् बने । त्यसपछि नयाँ सरकार गठन हुँदा उनले उद्योग मन्त्री पनि पाए, तर गएनन् । त्यसपछि पनि उनी चर्चामै रहेका थिए ।
ती चर्चित अमरेस पछिल्लो करिब २ महिना यता भने एक प्रकारले भूमिगत जस्तै थिए । उनी संसदमा उपस्थित भएनन्, बोल्ने समय पनि मागेनन् । तर, दुई दिन अघि उनी संसदमा झुल्किए । उनले बोल्ने समय नै मागे र बोले । उनी यसरी संसदमा बोले के पूरै सरकारको विरुद्धमै देखिए ।
उनले प्रधानमन्त्रीदेखि अर्थमन्त्रीसम्म खनिए । संसदमा उपस्थित नभएका अर्थमन्त्री र प्रधानमन्त्रीलाई त राजा महाराजाजस्तो भनेर टिप्पणी गरे । अनि परम्परा सबै भत्काउँदै जाने हो भने त प्रधानमन्त्री पद नै भत्काइदिए भैगो नि पनि भने ।
उनले मधेश विस्फोट हुनका लागि ठिक्क परेर बसेको खुलासा पनि गरे । त्यतिले मात्र नभएर हिजो त एक टेलिभिजनसँगको कुराकानीमा यो पाराले सरकार नचल्ने भन्दै प्रधानमन्त्रीलाई नै चुनौती दिए ।
उनले नेपालको सरकार पाकिस्तान मोडलमा अर्थात अनुदारवादी मोडलमा जान लागेको सम्म आरोप लगाउन भ्याए । यस्तै अवस्था हो भने बहुदलीय व्यवस्था नै नरहेका सम्म उनले टिप्पणी गरे ।
उनले आफ्ना अधिकांश अभिव्यक्तिमा सरकारकै विरुद्धमा आगो ओकलेका छन् । अनि, यो पाराले सरकार चल्दैन भनेर दोहोर्याइरहेका छन् । अहिले रास्वपाकै सांसद जो विपक्षी दलहरु भन्दा पनि चर्को स्वरमा सरकारको विरोधमा, यसरी आगो ओकलिरहेकाले रास्वपा मात्र होइन कि अरुले पनि प्रश्न गरिरहेका छन्, अमरेस किन यसरी आगो ओकलिरहेका छन् ?
