पोखरा । कम्युनिस्ट बिचार बोकेर काँग्रेसले कम्युनिस्टलाई हराउन नसक्ने भन्दै काँग्रेस र कम्युनिस्टको विकल्प राप्रपा भएको राष्ट्रिय प्रजातन्त्र पार्टीका अध्यक्ष कमल थापाले दाबी गरेका छन् । आज पोखराको बिरौटामा आयोजित कास्की–२ को उपनिर्वाचन प्रचार अभियानको क्रममा सभालाई सम्बोधन गर्दै थापाले बिगतमा आफूहरुबाट भएका त्रुटि र कमजोरीबाट पाठ सिक्दै सच्चिएर अघि बढ्ने समेत प्रतिबद्धता ब्यक्त गरे ।
‘राप्रपाले आगामी दिनमा जनता केन्द्रित, संगठन केन्द्रित सिद्धान्त केन्द्रित राजनीति गर्नेछ’ भन्दै थापाले भने, ‘सत्ताकेन्द्रीत राजनितीलाई महत्त्व नदिई आदर्शको राजनीति गर्छौंँ ।’ मुलुकमा व्याप्त विकृति, बिसङ्गति, ब्रम्हलुटको विपक्षमा उभिन पोखरेली जनतालाई आग्रह गर्दै थापाले वाइडबढी, तेत्तीस क्विन्टल सुन, बालुवाटार जग्गा, एनसेल कर छली प्रकरणलाई बल पुग्ने गरि काँग्रेस कम्युनिस्ट नरोज्न मतदातालाई अनुरोध गरे ।
विधिको शासन, बेरोजगारी समस्या र भ्रष्टाचारको अन्त्य, स्वाधिनताको रक्षा र सिमाको सुरक्षा चाहनेले राप्रपाजस्तो राष्ट्रबादी शक्ति रोज्न आग्रह गर्दै उनले धर्म, संस्कृतिको नास गर्नेहरु सँग सतर्क रहनुपर्ने विचार व्यक्त गरे । राजनीतिक परिवर्तनले धर्मान्तरण र विदेशी प्रभाव अनि दबाब मात्र बढाएको भन्दै राष्ट्रियता कमजोर भएको पनि उनले टिप्पणी गरेका थिए ।
कार्यक्रममा उपाध्यक्ष तथा पूर्व मन्त्री तोरण बहादुर गुरुङ, प्रदेश अध्यक्ष हेमजङ्ग गुरुङ ,सहायक महामन्त्री मदन बहादुर कार्की, विन्दु पहारी, केन्द्रीय सदस्य तथा निर्वाचन परिचालन संयोजक जयलाल पुन लगायतले धारणा थिए ।
