काठमाडौं । संसदीय सुनुवाई समितिले सर्वोच्च अदालतको प्रधानन्यायाधीश पदमा नियुक्तिका लागि सिफारिस हुनुभएका न्यायाधीश डा. मनोजकुमार शर्माको नाम सर्वसम्मत रूपमा अनुमोदन गरेको छ ।
प्रधानन्यायाधीशमा सिफारिस हुनुभएका शर्मालाई समितिको मंगलवार बसेको संसदीय समितिको बैठकले अनुमोदन गरेको हो । संघीय संसदको संयुक्त बैठक र संयुक्त समिति (कार्यसञ्चालन) नियमावली, २०८० को नियम २६ को उपनियम ५ बमोजिम शर्माको नाम सर्वसम्मत रूपमा स्वीकृत भएको समितिका सभापति वोधनारायण श्रेष्ठले जानकारी दिनुभयो ।
सुनुवाई प्रक्रियाका क्रममा प्रश्तावित प्रधानन्यायाधीश विरुद्ध परेका उजुरीहरूको सन्दर्भमा समेत समितिले निर्णय गरेको छ । सभापति श्रेष्ठकाअनुसार प्राप्त उजुरीहरूलाई व्यवस्थित रूपमा अभिलेखीकरण गर्ने, वर्गीकरण गर्ने र आवश्यक अध्ययनका लागि सम्बन्धित निकायमा पठाउने सहमति भएको छ । विशेष गरी ती उजुरीहरूलाई समीक्षासहित अभिलेखका लागि संवैधानिक परिषद्मा नै फिर्ता पठाइने समितिले जनाएको छ ।
संवैधानिक परिषद्ले वैशाख २४ गते शर्मालाई प्रधानन्यायाधीशमा सिफारिस गरेको थियो ।
उहाँले आगामी सुनुवाई प्रक्रियालाई थप परिष्कृत र सुधार गर्दै लैजाने प्रतिवद्धता समेत व्यक्त गर्नुभयो । संसदीय सुनुवाई समितिबाट नाम अनुमोदन भएसँगै राष्ट्रपतिद्वारा प्रधानन्यायाधीश नियुक्त गर्ने संवैधानिक प्रावधान रहेको छ । –न्युज एजेन्सी नेपाल
तस्बिर : किरणराज विष्ट/रासस
