काठमाडौं । राष्ट्रिय प्रजातन्त्र पार्टी (राप्रपा)ले सरकार मुलुकका वास्तविक समस्या समाधानभन्दा नारामुखी आशावाद प्रस्तुत गर्न केन्द्रित भएको आरोप लगाएको छ ।
सोमवार प्रतिनिधि सभा बैठकमा आगामी आर्थिक वर्ष २०८३/०८४ का लागि प्रस्तुत विनियोजन विधेयकका सिद्धान्त र प्राथमिकतामाथिको छलफलमा भाग लिँदै राप्रपाकी प्रमुख सचेतक खुश्वु ओलीले सरकारले देशको सामाजिक तथा आर्थिक यथार्थलाई गम्भीर रूपमा विश्लेषण नगरेको बताउनुभयो ।
उहाँले सरकारले ल्याएको सिद्धान्त र प्राथमिकताले मुलुकका विद्यमान समस्या समाधान गर्ने स्पष्ट आधार प्रस्तुत गर्न नसकेको जिकिर गर्नुभयो । “तत्काल सम्बोधन गर्नुपर्ने विषयहरूमा बजेटको फोकस आवश्यक छ,” उहाँले भन्नुभयो, “राजस्व दबाबमा छ, युवाहरू विदेश पलायन भइरहेका छन्, कृषि उत्पादन घट्दो छ, निजी क्षेत्र त्रसित छ, सार्वजनिक ऋणको भार बढ्दो छ र पूँजीगत खर्च अत्यन्त कमजोर अवस्थामा छ ।”
प्रमुख सचेतक ओलीले स्थानीय तहमा सेवा प्रवाहसमेत असमान रहेको उल्लेख गर्दै यस्ता यथार्थबीच सरकारले समस्या पहिचान गरी प्रभावकारी हस्तक्षेप गर्नुपर्नेमा पुनः नारामूलक आशावाद मात्रै प्रस्तुत गरेको अनुभूति भएको बताउनुभयो ।
उहाँले मुलुकको समृद्धिका लागि कृषि, पर्यटन, ऊर्जा लगायतका उत्पादनमुखी क्षेत्रको विकासमा सरकारले विशेष जोड दिनुपर्ने आवश्यकता पनि औँल्याउनुभयो ।
