काठमाडौं । नेपाली कांग्रेसका सांसद तथा संसदीय दलका उपनेता अभिषेक प्रताप शाहले पूर्व गृहमन्त्री सुदन गुरुङ ले सार्वजनिक गरेको सम्पत्ति विवरणमाथि निष्पक्ष र पारदर्शी छानबिन गर्न सरकारसँग माग गर्नुभएको छ।
प्रतिनिधिसभामा बोल्दै सांसद शाहले पूर्व गृहमन्त्री गुरुङको सम्पत्ति विवरण अस्वाभाविक र शंकास्पद देखिएको भन्दै तत्काल उच्चस्तरीय अनुसन्धान आवश्यक रहेको बताउनुभयो। उहाँले आयोग नै पूर्व गृहमन्त्रीलाई बचाउन र चोख्याउनतर्फ लागेको भन्ने जनस्तरमा व्यापक आशंका र चर्चा रहेको उल्लेख गर्नुभयो।
उहाँले कुनै पनि शक्तिशाली पदमा बसेका व्यक्तिले कानुनभन्दा माथि रहने उन्मुक्ति पाउन नहुने बताउँदै आयोगले कुनै दबाब वा प्रभावमा परेर काम गर्न नहुने धारणा राख्नुभयो।
सांसद शाहले प्रतिनिधिसभा जनताको विश्वासको केन्द्र भएकाले सरकारलाई आयोगका गतिविधिमाथि निगरानी राख्न र पूर्व गृहमन्त्रीको सम्पत्तिको पारदर्शी तथा निष्पक्ष छानबिन सुनिश्चित गर्न आग्रह गर्नुभयो।
