काठमाडौं । नेपाली कांग्रेसका नेता प्रकाशमान सिंहले पार्टी सभापति गगनकुमार थापालाई लक्षित गर्दै पार्टी नेतृत्वमा पुग्न हतार गर्ने नाममा विधि र विधान उल्लङ्घन गर्न नहुने बताएका छन् ।
बागमती प्रदेशस्तरीय विशेष भेलालाई सम्बोधन गर्दै नेता सिंहले पार्टीको आन्तरिक प्रक्रियालाई कमजोर बनाउने प्रयास भइरहेको आरोपसमेत लगाएका छन् । उनले पार्टीको १४औँ महाधिवेशनका प्रतिनिधिहरूको फर्जी हस्ताक्षरमार्फत पार्टी कब्जा गर्ने प्रयास भएको दाबी गर्दै त्यसप्रति गम्भीर आपत्ति जनाए ।
नेता सिंहले नेपाली कांग्रेस ऐतिहासिक रूपमा लोकतन्त्र र जनअधिकारका लागि अग्रणी भूमिका खेल्दै आएको उल्लेख गर्दै सो उपलब्धि र योगदानलाई बिर्सन नहुने धारणा राखे । उनले पार्टीभित्र निर्णय प्रक्रिया विधान र स्थापित विधिअनुसार नै अघि बढ्नुपर्नेमा जोड दिए ।
उनका अनुसार पार्टीभित्रको छलफल र बहस लोकतान्त्रिक अभ्यास भए पनि नियमभन्दा बाहिर गएर कुनै पनि गतिविधि स्वीकार्य हुन नसक्ने स्पष्ट संकेत दिए । उनले पार्टीलाई कमजोर बनाउने कुनै पनि कदमप्रति नेतृत्व र अग्रजहरू चुप लागेर नबस्ने चेतावनीसमेत दिए ।
सिंहले सबै तहका नेता तथा कार्यकर्तालाई एकताबद्ध गर्दै नियमित महाधिवेशनमार्फत पार्टीलाई सुदृढ बनाउनुपर्ने आवश्यकता औँल्याएका छन् ।
