काठमाडौँ। राष्ट्रिय प्रजातन्त्र पार्टी (राप्रपा) की प्रमुख सचेतक खुश्बु ओलीले सरकारको नीति तथा कार्यक्रमको प्रभावकारी कार्यान्वयनमा जोड दिँदै छलफलका लागि उपलब्ध गराइएको समय पर्याप्त नभएको बताउनुभएको छ ।
सरकारले प्रश्तुत गरेको नीति तथा कार्यक्रमका सम्बन्धमा आफ्नो धारणा सार्वजनिक गर्दै उहाँले कार्यान्वयन पक्ष नै मुख्य चुनौती र महत्वपूर्ण विषय भएको औंल्याउनुभएको हो ।
प्रमुख सचेतक ओलीले नीति तथा कार्यक्रम सुन्दा सधैँ सकारात्मक र उत्कृष्ट लाग्ने भएपनि त्यसको सफल कार्यान्वयन नै वास्तविक उपलब्धि हुने धारणा व्यक्त गर्नुभयो ।
वर्तमान सरकारसँग दुई तिहाइ निकटको बहुमत रहेकाले यस पटक नीति तथा कार्यक्रमको कार्यान्वयन प्रभावकारी हुनेमा उनले आशा व्यक्त गर्नुभयो ।
यद्यपि, कार्यान्वयनको पक्ष कस्तो रहन्छ भन्ने विषयमा शङ्काको लाभ दिँदै नतिजा पर्खिनुको विकल्प नभएको उहाँको तर्क छ । संसदीय प्रक्रियाप्रति असन्तुष्टि जनाउँदै ओलीले नीति तथा कार्यक्रम प्रश्तुत भएकै दिन छलफल टुङ्ग्याएर पारित गर्ने तयारी गरिएकोमा आपत्ति प्रकट गर्नुभयो ।
उहाँले भन्नुभयो, ‘विगतमा नीति तथा कार्यक्रममाथि छलफलका लागि पाँच दिनसम्मको समय उपलब्ध गराइने प्रचलन थियो । नीति तथा कार्यक्रम सत्ता पक्ष र प्रतिपक्ष दुवैका लागि उत्तिकै महत्त्वपूर्ण विषय हो । तर छलफलको समय सङ्कुचित गरिँदा सांसदहरूले आफ्ना निर्वाचन क्षेत्र र जनताका मुद्दा सदनमा सशक्त रूपमा राख्न पाउने अधिकार कुण्ठित भएको छ ।’
सांसदहरूले सदनमा राख्ने विचार र हुने बहसकै आधारमा आगामी योजनाहरू परिमार्जित र तय हुने उल्लेख गर्दै उहाँले पर्याप्त बहस बिना कार्यक्रम पारित गरिनु न्यायसङ्गत नहुने बताउनु भयो ।
ओलीले सभामुखमार्फत छलफलको समय बढाउन र पर्याप्त समय उपलब्ध गराउन निरन्तर ध्यानाकर्षण गराइरहेको समेत जानकारी दिनुभयो ।–न्युज एजेन्सी नेपाल
