झापा। नेपाल रेडक्रस सोसाइटी झापाले मनसुनमा बाढीजन्य विपद्बाट प्रभावित हुनससक्ने परिवारको पहिचान गरेको छ ।
मौसम पूर्वानुमान र बाढीको प्रकोपबाट विगतमा प्रभावित भूभागहरूको अध्ययन र विश्लेषणका आधारमा जिल्लाका नदी तटीय क्षेत्रका आठ हजार ९१५ परिवार सम्भावित जोखिम रहेको जनाइएको छ । रेडक्रमसले हरेक वर्ष ‘मनसुन पूर्वतयारी तथा प्रतिकार्य योजना’ सार्वजनिक गर्दै आएको छ ।
यस वर्षको मनसुनमा जिल्लाका १४ पालिकाका ११ वटा नदीमा आउनसक्ने बाढी र त्यसबाट प्रभावित हुनसक्ने परिवारको तथ्याङ्क प्रक्षेपण गरी सोहीअनुसार तयारीका लागि सार्वजनिक गरिएको रेडक्रस झापा शाखाका अधिकृत हरिशरण खड्काले जानकारी दिनुभयो ।
‘मनसुन पूर्वतयारी तथा प्रतिकार्य योजना २०८३’मा उल्लेख भएअनुसार यहाँ रहेका नदीमध्ये कनकाईबाट दुई हजार २४९, मेचीबाट एक हजार ९०, बिरिङबाट दुई हजार ११५, रतुवाबाट एक हजार ३३०, निन्दाबाट १५०, कमल र बनियानीबाट एक हजार १५ परिवार, हडियाबाट १७५ परिवार, देवनियाबाट ४४५ र टाङटिङ तथा नेतेबाट ३५० परिवार प्रभावित हुने प्रक्षेपण गरिएको छ ।
कनकाई नदीले झापा गाउँपालिकाको वडा नं १, २, ३ र ७, गौरीगञ्ज गाउँपालिकाको वडा नं १ र २, शिवसताक्षी नगरपालिकाको वडा नं ४, ५, ६, ७ र १० मा र कनकाई नगरपालिकाको वडा नं ४ मा २४९ घरधुरीलाई प्रभावित पार्नसक्ने जनाइएको छ ।
यसैगरी, बिरिङ नदीले कनकाई नगरपालिकाको वडा नं ६ र ९, बाह्रदशी गाउँपालिकाको वडा नं १, २, ३, ४, ५ र ७ मा, कचनकबल गाउँपालिकाको वडा नं १, झापा गाउँपालिकाको वडा नं ४, ५ र ७, अर्जुनधारा नगरपालिकाको वडा नं. १, ४, ७ र ८ र बुद्धशान्ति गाउँपालिकाको वडा नं २ मा गरी कुल दुई हजार २१५ परिवारलाई यसपालीको वर्षायाममा प्रभावित पार्नसक्ने अनुमान गरिएको छ ।
रेडक्रसले मनसुनबाट निम्तिने विपद्बाट प्रभावितहरूको उद्धार, आश्रयस्थल र राहत वितरणको समेत पूर्वतयारी गर्दै आएको छ । प्रतिकार्य योजनाअनुसार जिल्लाका मुख्य नदीनालाबाट प्रभावित हुनसक्ने स्थान र आश्रयस्थलको विवरण तयार पारेर सोहीबमोजिम पूर्वतयारी गरिएको शाखा अधिकृत खड्काले बताउनुभयो ।
उहाँका अनुसार जिल्लाका १४ पालिकाका ११२ स्थानलाई विपद्का बेला प्रभावित परिवारलाई राख्ने आश्रयस्थल तोकिएका छन् । अधिकांश आश्रयस्थल विद्यालय, सामुदायिक भवन र स्थानीय तहका संरचनामा छन् । रासस
