काठमाडाैँ । कैलाली जिल्ला अदालतले बैंकिङ्ग कसुरको मुद्दामा तत्कालीन नेकपा (माओवादी केन्द्र) बाट राष्ट्रिय सभा सदस्य रहेका जगतबहादुर पार्कीविरुद्ध पक्राउ पुर्जी जारी गरेको छ। अदालतले जारी गरेको उक्त वारेन्ट अनुसार हाल उनी कानुनी कारबाहीको दायरामा परेका छन्।
डडेल्धुराको आलिताल गाउँपालिका–७ स्थायी ठेगाना भएका पार्कीविरुद्ध धनगढी उपमहानगरपालिका–३ का नरेशबहादुर थापाले बैंकिङ्ग कसुरसम्बन्धी मुद्दा दायर गरेका थिए। सो मुद्दा जिल्ला अदालत कैलालीमा चैत २ गते दर्ता गरिएको थियो, जसको दर्ता नम्बर ०८२–सि १–०७६९ रहेको छ।
उक्त मुद्दामा सुनुवाइपछि अदालतले चैत १७ गते पार्कीविरुद्ध पक्राउ पुर्जी जारी गरेको हो। तर, वारेन्ट जारी भएको समयदेखि हालसम्म पनि उनी पक्राउ परेका छैनन्। कानुनी प्रक्रिया अगाडि बढिरहे पनि उनको अवस्थाबारे थप विवरण सार्वजनिक भएको छैन। यसैबीच, अदालतको आदेश कार्यान्वयन र आरोपीको उपस्थितिबारे चासो बढिरहेको छ।
