काठमाडौँ । विघटित नेपाल विद्यार्थी संघ (नेविसंघ)ले विश्वविद्यालयहरूमा विद्यार्थी संगठन निषेध गर्ने र प्रहरी इकाइ स्थापना गर्ने सरकारी घोषणाको विरोधमा चित्रकला प्रतियोगिता आयोजना गरेको छ ।
सरकारले विश्वविद्यालयमा प्रहरी इकाइ स्थापना गर्ने निर्णयले शैक्षिक वातावरणमा भय र त्रास सिर्जना हुने भन्दै त्यसको विरोधस्वरूप प्रतियोगिता आयोजना गरिएको नेविसंघका निवर्तमान केन्द्रीय सचिव हिमाञ्चल घिमिरेले जानकारी दिए ।
उनका अनुसार शिक्षा क्षेत्रलाई शान्ति क्षेत्रका रूपमा कायम राख्नुपर्ने सन्देश प्रवाह गर्ने उद्देश्यसहित प्रतियोगिता गरिएको हो । सरकारको सयदिने कार्यसूचीको ८६ नम्बर बुँदामा विश्वविद्यालयहरूमा विद्यार्थी संगठन खारेज गर्ने र त्यसका लागि प्रहरी इकाइ स्थापना गर्ने उल्लेख रहेको भन्दै त्यसको खारेजीको माग पनि गरिएको उनले बताए ।
प्रतियोगितामा ४५ जना चित्रकार सहभागी भएका छन् । प्रथम हुनेलाई २० हजार रुपैयाँ, दोस्रो हुनेलाई १५ हजार रुपैयाँ र तेस्रो हुनेलाई १० हजार रुपैयाँ पुरस्कार प्रदान गरिने आयोजकले जनाएको छ ।
प्रतियोगिताको नतिजा आजै वा भोलिसम्म सार्वजनिक गरिने घिमिरेले जानकारी दिए।
