काठमाडौं । नेपाल उद्योग वाणिज्य महासंघको एसोसिएटतर्फको उपाध्यक्षमा उद्योगी प्रबलजंग पाण्डे निर्वाचित भएका छन् । बुधबार सम्पन्न मतगणनाको अन्तिम परिणामअनुसार पाण्डेले बहालवाला उपाध्यक्ष ज्योत्सना श्रेष्ठलाई फराकिलो मतान्तरले पराजित गर्दै विजय हासिल गरेका हुन् ।
निर्वाचन समितिले सार्वजनिक गरेको नतिजाअनुसार पाण्डेले कुल १०७९ मत प्राप्त गरेका छन् भने उनका प्रतिस्पर्धी ज्योत्सना श्रेष्ठ सुब्बाले ७५० मत प्राप्त गरेकी छन् । मतगणनाको प्रारम्भिक चरणदेखि नै अग्रता बनाउँदै आएका पाण्डेले अन्तिमसम्म पनि आफ्नो अग्रता कायम राख्दै निर्णायक जित हात पारेका हुन् ।
यस जितसँगै नेपाल उद्योग वाणिज्य महासंघको नयाँ कार्यसमितिमा एसोसिएट क्षेत्रको नेतृत्व पाण्डेले सम्हाल्ने निश्चित भएको छ । निर्वाचन समितिले अन्तिम औपचारिक घोषणा गर्ने तयारी गरिरहेको जनाएको छ ।
यसैगरी महासंघको निर्वाचनअन्तर्गत महिला सदस्यतर्फ जमुना माथेमा र अभिज्ञा मल्ल विजयी भएका छन् । मत परिणामअनुसार जमुना माथेमाले ११४६ मत प्राप्त गरेकी छन् भने अभिज्ञा मल्लले १०१४ मत हासिल गरेकी छन् । त्यस्तै जमुना पौडेलले ७०२ मत र शोभा ज्ञवालीले ७२१ मत प्राप्त गर्दै पराजित भएका छन् ।
यससँगै महासंघको वस्तुगत, जिल्ला–नगर र एसोसिएट गरी तीनै क्षेत्रका उपाध्यक्ष पदको निर्वाचन परिणाम सार्वजनिक भएको छ । यसअघि नै वस्तुगततर्फ नरेशलाल श्रेष्ठ तथा जिल्ला–नगरतर्फ कृष्णप्रसाद शर्मा र दिलसुन्दर श्रेष्ठ निर्वाचित भइसकेका थिए ।
