काठमाडाैँ । सभामुख डोलप्रसाद अर्यालले संसदको आउँदो अधिवेशनलाई प्रभावकारी बनाउने विषयमा संसदमा प्रतिनिधित्व गर्ने प्रमुख सचेतक तथा सचेतकहरूसँग छलफल गर्नुभएको छ।
सिंहदरबारस्थित सभामुखको कार्यकक्षमा भएको छलफलमा संसदको सञ्चालन अवस्था, विद्यमान समस्या तथा आगामी अधिवेशनलाई कसरी प्रभावकारी बनाउन सकिन्छ भन्ने विषयमा केन्द्रित रहेर विचारविमर्श भएको हो। छलफलमा सरकार तथा प्रतिपक्षी दलका प्रतिनिधिहरू सहभागी भएका थिए।
छलफलपछि सञ्चारकर्मीसँग कुरा गर्दै राष्ट्रिय स्वतन्त्र पार्टी (रास्वपा) की सचेतक क्रान्तिशिखा धितालले संसदको कार्यप्रणालीलाई अझ प्रभावकारी बनाउने विषयमा सामान्य र सकारात्मक छलफल भएको बताउनुभयो। उहाँका अनुसार नयाँ प्रमुख सचेतक तथा सचेतकहरू नियुक्त भएपछि सभामुखसँग भएको यो पहिलो भेटघाट भएकाले बधाई तथा शुभकामना आदानप्रदान पनि भएको थियो।
उहाँले भन्नुभयो, “संसदमा हुने कामकारबाहीलाई प्रभावकारी बनाउने विषयमा छलफल भयो। सभामुखज्यूसँग यसरी भेटघाट भएको थिएन, त्यसैले सत्तारुढ र प्रतिपक्षी दुवै दलका केही जिज्ञासाहरू पनि राखेर छलफल सामान्य रूपमा सम्पन्न भयो।”
त्यस्तै रास्वपाकै अर्का सचेतक प्रकाशचन्द्र परियारले संसदमा प्रतिनिधित्व गर्ने ६ वटै दलका प्रमुख सचेतक तथा सचेतकहरूसँग सभामुखले संसद सञ्चालनको अवस्था र देखिएका समस्याबारे छलफल गर्नुभएको जानकारी दिनुभयो। उहाँका अनुसार सभामुख अर्यालले संसदलाई अझ प्रभावकारी बनाउन दलहरूसँग समन्वय र सहकार्य गर्दै अघि बढ्ने प्रतिबद्धता व्यक्त गर्नुभएको छ।
उहाँले भन्नुभयो, “सभामुखज्यूले संसदको अहिलेको धरातलीय यथार्थ र देखिएका समस्यालाई कसरी समाधान गर्न सकिन्छ भन्ने विषयमा छलफल गर्नुभयो। मुख्य रूपमा दलका सचेतकहरूले सभामुखसँगको समन्वयमा संसदलाई प्रभावकारी बनाउने विषयमा जोड दिनुभयो।”
यता नेपाली कांग्रेसकी प्रमुख सचेतक बासना थापाले संसद छिटो सञ्चालन गर्न आफूहरूले सभामुखसमक्ष आग्रह गरेको बताउनुभयो। उहाँले छलफलमा कुनै ठोस एजेण्डा नभए पनि संसदको प्रभावकारिता बढाउन सहकार्य र समन्वय आवश्यक रहेको विषयमा छलफल भएको उल्लेख गर्नुभयो।
उहाँले भन्नुभयो, “सभामुखज्यूसँग सहकार्य गर्दै संसदको कामकारबाही अघि बढाउने विषयमा छलफल भयो। सरकारको कामकारबाहीबारे विस्तृत छलफल भएन, तर संसद छिटो सञ्चालन गरौँ भन्ने हाम्रो आग्रह थियो। सभामुखज्यूले भोलिसम्म केही जानकारी आउँछ भन्नुभएको छ।”
छलफलमा सभामुख अर्यालले आगामी बर्खे अधिवेशन छिट्टै आह्वान हुने विश्वास व्यक्त गर्नुभएको सहभागीहरूले बताएका छन्। साथै संसद सञ्चालनमा देखिएका समस्यालाई समाधान गर्दै प्रभावकारी बनाउन सबै दलसँग सहकार्य गर्ने उहाँको प्रतिबद्धता रहेको पनि बताइएको छ।
