काठमाडौं । कानून, न्याय तथा संसदीय मामिलामन्त्री सोविता गौतमले सांसदहरूलाई जनचासोका विषयमा केन्द्रित भएर छलफल गर्न आग्रह गर्नुभएको छ।
सोमबार सिंहदरबारमा बसेको संघीय संसद प्रतिनिधिसभाअन्तर्गतको कानून, न्याय तथा मानव अधिकार समितिको बैठकमा बोल्दै मन्त्री गौतमले संसद र संसदीय समितिको कार्यलाई प्रभावकारी बनाउन विषयवस्तुमा केन्द्रित बहस आवश्यक रहेको बताउनुभयो। उहाँका अनुसार सांसदहरूले स्पष्ट एजेण्डा लिएर छलफल गरे मात्र सरकारले पनि तयारीसहित स्पष्ट जवाफ दिन सक्ने अवस्था सिर्जना हुन्छ।
मन्त्री गौतमले सरकार सांसदहरूले उठाएका सबै विषयप्रति संवेदनशील रहेको उल्लेख गर्दै ती विषयलाई व्यवस्थित ढंगले उठान गरिनु आवश्यक रहेको धारणा राख्नुभयो। उहाँले एजेण्डा केन्द्रित छलफलले सरकारलाई आफ्नो धारणा तयार गर्न र जवाफ दिन सहज हुने बताउनुभयो।
समितिमा हुने छलफलमा समय व्यवस्थापन र अनुशासनको पनि आवश्यकता रहेको उहाँको भनाइ थियो। संसदमा जस्तै समितिमा पनि समयको ख्याल नगरे बैठक अनावश्यक रूपमा लम्बिने र प्रभावकारिता घट्ने उहाँले संकेत गर्नुभयो।
उहाँले समितिमा छलफल गर्दा निर्धारित एजेण्डाभित्र रहेर विषय उठान गर्नुपर्नेमा जोड दिँदै यसले बैठकलाई थप व्यवस्थित र परिणाममुखी बनाउने विश्वास व्यक्त गर्नुभयो।
मन्त्री गौतमले अन्ततः संसदको मुख्य उद्देश्य जनताको चासोका विषयलाई सम्बोधन गर्नु भएकाले सबै सदस्यहरूले नियमअनुसार काम गर्दै संस्थाको प्रभावकारिता बढाउन ध्यान दिनुपर्ने बताउनुभयो ।
