काठमाडाैँ । मनोहरा सुकुम्बासी बस्तीमा सञ्चालित सरस्वती आधारभूत विद्यालयको भवन भत्काइएपछि त्यहाँ अध्ययनरत २७५ जना विद्यार्थीको भविष्य अन्योलमा परेको छ ।
विद्यालय भवन भत्काइएपछि हाल विद्यालयका फर्निचर तथा शैक्षिक सामग्रीहरू शिक्षक र प्रहरीको सहयोगमा लोकन्थलीस्थित मध्यपुर ठिमी नगरपालिका वडा नम्बर १ को वडा कार्यालयसँगै रहेको सामुदायिक भवनमा सारिएको छ । विद्यालय भवन विहिन भएपछि अहिले शिक्षकहरू उक्त सामुदायिक भवनमा उपस्थित भई प्रशासनिक काम र हाजिरी गर्ने कार्यमा मात्र सिमित भएका छन्।
विद्यालयको भौतिक संरचना नरहेपछि बालबालिकाको पठनपाठन पूर्ण रूपमा ठप्प भएको विद्यालयका प्रधानाध्यापक इन्दिरा महतले बताइन् । सोमवार विद्यालयको अवस्था र वैकल्पिक व्यवस्थाबारे बुझ्न करिव ६० जना अभिभावक शिक्षकलाई खोज्दै आएका प्रधानाध्यापक महतले बताइन् । आफ्ना बालबालिकाको शिक्षालाई लिएर चिन्तित बनेका अभिभावकहरूले विद्यालयको खोजी गर्दै आए पनि नगरपालिकाले हालसम्म विद्यालय स्थानान्तरण गर्ने वा नयाँ भवन निर्माण गर्ने सम्बन्धमा कुनै ठोस निर्णय हुन नसकेको उनले बताइन् ।
मध्यपुर ठिमी नगरपालिका वडा नम्बर १ भित्र अन्य कुनैपनि सरकारी विद्यालय नभएकाले सोही वडाभित्रै विद्यालयको व्यवस्थापन गरिनुपर्ने माग स्थानीय र अभिभावकहरूको छ । यद्यपि संघीय सरकारले भने उक्त विद्यालयलाई अन्य विद्यालयसँग गाभ्ने नीति अघि सारेको बुझिएको छ । तर, अन्य सरकारी विद्यालयहरू (सानोठिमी र कौशलटार) टाढा रहेका कारण साना बालबालिकालाई त्यहाँसम्म पुग्न व्यवहारिक रूपमा कठिनाइ हुने देखिएको छ ।
प्रधानाध्यापक महतकाअनुसार भोलिदेखि थप विद्यार्थी विद्यालयको सम्पर्कमा आउने क्रम बढ्दैछ । विद्यालयको विकल्प छिटो नखोजिए २ सय ७५ विद्यार्थीको शैक्षिक सत्र नै प्रभावित हुने जोखिम बढेको छ । हालसम्म नगरपालिकाबाट कुनै ठोस निर्णय नआउँदा शिक्षक, विद्यार्थी र अभिभावकहरू थप अन्योलमा परेका छन् ।
