काठमाडाैँ । स्याङ्जा प्रहरीले अवैध रूपमा नदीजन्य पदार्थ उत्खनन तथा ओसारपसार भइरहेको अवस्थामा दुई वटा ट्याक्टर नियन्त्रणमा लिएको छ।
प्राप्त सूचनाका आधारमा शनिबार जिल्ला प्रहरी कार्यालय स्याङ्जा र प्रहरी चौकी विरूवाअर्चलेबाट खटिएको संयुक्त प्रहरी टोलीले अनुगमन तथा कारबाही गरेको हो। अनुगमनका क्रममा विरूवा गाउँपालिका–०१ स्थित बास्तरा खोला र ज्याग्दी खोलाबाट रसिद बिना बालुवा उत्खनन तथा ओसारपसार भइरहेको अवस्थामा ट्याक्टरहरू फेला पारिएको प्रहरीले जनाएको छ।
प्रहरीका अनुसार नियन्त्रणमा लिइएका ट्याक्टरमध्ये ग.१ त. ५०५६ नम्बरको ट्याक्टर बास्तरा खोलाबाट र ग.१ त. ७६७१ नम्बरको ट्याक्टर ज्याग्दी खोलाबाट बालुवा ओसारपसार गर्दै गरेको अवस्थामा फेला परेका हुन्।
दुवै ट्याक्टर नियन्त्रणमा लिएर आवश्यक अनुसन्धान तथा कानुनी कारबाही प्रक्रिया अघि बढाइएको जिल्ला प्रहरी कार्यालय स्याङ्जाले जनाएको छ।
