काठमाडौं । नेपाली सेनाले आगामी वर्षायाममा हुन सक्ने बाढी, पहिरो, डुबान तथा नदी कटानजस्ता विपद् जोखिमलाई मध्यनजर गर्दै पूर्वतयारी तीव्र पारेको जनाएको छ ।
नेपाली सेनाले बुधबार जारी गरेको प्रेस विज्ञप्तिमा विगतका वर्षहरूमा देखिएका विपद्का घटनाबाट सिक्दै यसपटक पनि सरोकारवाला निकायहरूसँग समन्वय र सहकार्यमा तयारी अघि बढाइएको उल्लेख गरिएको छ ।
सेनाले मानवीय तथा भौतिक क्षति न्यूनीकरण गर्ने उद्देश्यसहित सम्भावित जोखिम क्षेत्रको पहिचान तथा जोखिम नक्साङ्कन (ह्याजार्ड म्यापिङ) को कार्यलाई प्राथमिकताका साथ अघि बढाइएको जनाएको छ । यसका लागि स्थानीय युनिटहरूलाई आ–आफ्नो कार्यक्षेत्रमा तथ्याङ्क अद्यावधिक गर्न निर्देशन दिइएको पनि विज्ञप्तिमा उल्लेख छ ।
यसैबीच, सामाजिक सञ्जाल तथा केही सञ्चार माध्यममा नेपाली सेनाले सुकुम्बासीहरूको विवरण माग गरेको भन्ने आशयका समाचारप्रति सेनाले आपत्ति जनाएको छ ।
सेनाले उक्त दाबीलाई अस्वीकार गर्दै आफ्नो गतिविधि कुनै पनि व्यक्तिको विवरण संकलनका लागि नभई विपद् व्यवस्थापनलाई प्रभावकारी बनाउन जोखिमयुक्त क्षेत्रको पहिचान तथा तयारीका लागि मात्र गरिएको स्पष्ट पारेको छ ।
सेनाले विपद् प्रभावित अवस्थामा सुरक्षा फौज तैनाथ गरी तत्काल उद्धार, राहत वितरण तथा पुनर्स्थापना कार्य सहज बनाउन पूर्वतयारीलाई केन्द्रमा राखिएको जनाएको छ ।
सम्बन्धित निकायहरूसँग निरन्तर समन्वय गर्दै जनधनको सुरक्षा सुनिश्चित गर्ने कार्यमा नेपाली सेना प्रतिबद्ध रहेको पनि विज्ञप्तिमा उल्लेख छ ।
